Хезмәт

Туган көнгә, йөрәктән чыккан иң матур котлау сүзләре

Якыннарыгыз, туганнарыгыз, хезмәттәшләрегез, туган көннәре, юбилейлары белән котлау өчен иң матур татарча котлау текстлары.

Әниебез! Сине туган көнең белән чын күңелдән котлыйбыз. Көннәрең шатлык белән үтсен, гомер юлларың озын булсын, кайгы-хәсрәт күрми, һаман шулай безгә, оныкларыңа терәк һәм киңәшче булып, әти белән бергә матур итеп яшәгез. Төпле киңәшең, җылы сүзең, нурлы йөзең өчен рәхмәт.

Котлы булсын бәйрәмең,
Тыныч булсын күңелең.
Шатлык-сөенечләр белән
Тулы булсын гомерең.

Иң изге теләкләр белән әтиебез, балаларың, оныкларың. Бу теләкләргә кода-кодагыйларың да кушыла.

* * *

Сөекле әтиебез! Сине гомереңнең иң истәлекле көне – күркәм юбилеең белән чын күңелдән тәбрик итәбез. Сиңа кояштай озын гомер, корычтай нык сәламәтлек, мул, имин тормышта, әниебез белән гел дә шулай тигезлектә, күз карасыдай үстергән балаларыңның игелеген күреп, оныкларыңның яратуын тоеп, борчу-мәшәкать күрми, мәңге бәхетле гомер кичерүеңне телибез.

Рәхмәт, әти, барысы өчен рәхмәт,
Булдың безгә һәрчак зур терәк.
Синең нәсыйхәт безгә гел кирәк,
Синдәй әтиләр җирдә бик сирәк.

Иң изге теләкләр белән улың, кызың, киявең һәм киленең, оныкларың. Ихлас теләкләргә кадерле әниебез дә кушыла.

* * *

Гомер уза, аккан сулар кебек...
Хөрмәтле җиңгәбез!
Сине юбилеең белән ихлас котлыйбыз. Синең яхшылыкларың, файдалы киңәшләрең, ярдәмчелегең өчен сиңа Аллаһның рәхмәте булсын. Киләчәктә дә сәламәт булып, бергә-бергә яшәргә язсын.
Быел абыебыз белән тормыш корып яши башлавыгызга да 45 ел тула.

Тормыш юлын бергә башлагансыз,
Ахыргача бергә үтегез.
Авырлыклар килсә, бергә уртаклашып,
Шатлыкларны бергә бүлегез!
Тик бәхетле гомер итегез!

Иң изге теләкләр белән туганнарың. Бу теләкләргә балаларыбыз да кушыла.

* * *

Хөрмәтле хезмәттәшебез!

Сезне олы юбилеегыз белән чын күңелдән котлыйбыз. Сезгә алга таба да гел шат яшәвегезне, гомер сукмагыгыздан тигез баруыгызны, бәхетле картлык, җан тынычлыгы телибез.
Агымсулар кире акмагандай,
Кабат кайтмый үткән гомерләр.
Кайтмаса да яшьлек, картлыкта да
Күтәренке булсын күңелләр.

Хөрмәт белән хезмәттәшләрең коллективы.

* * *

Әтиебез! Сине олуг юбилеең белән чын күңелдән котлыйбыз. Сиңа озын гомер, сәламәтлек, тигез, матур картлык телибез. Син тормышта безнең барыбыз өчен дә олы теләк булдың. Киләчәктә дә безнең арабызда таза- сау булып, безнең шатлыкларга сөенеп яшәвеңне телибез.

Олы синең биргән киңәшләрең,
Туры синең әйткән сүзләрең.
Шатлык, сөенечтән генә торсын,
Син үтәсе гомер юлларың.

Без ялгышсак, кичерәсең,
Күңелең киң, беләбез.
Кичер, әткәй, сиңа күбрәк
Ярдәм сорап киләбез.

Аллаһ сиңа озын гомер,
Гомерле шатлык бирсен.
Кайгы- хәсрәтсез тормыш,
Бәхетле картлык бирсен.

Иң изге теләкләр белән балаларың, оныкларың. Безнең бу котлауларга әниебез һәм әбиебез дә кушыла.

* * *

Кадерлебез, сине шушы күркәм гомер бәйрәмең белән котлап, саулык-сәламәтлек, бәрәкәтле тормыш, күңел тынычлыгы телибез. Аллаһы Тәгалә насыйп итеп, алдагы көннәреңдә дә куанычлар белән балаларыңның, оныкларыңның шатлыкларына сөенеп, кадер-хөрмәттә, тынычлыкта кайгы-хәсрәтсез яшәргә язсын.

Котлы булсын юбилеең,
Озак яшә, бул син бәхетле.
Куанычлар гына юлдаш булсын,
Яшә шатлыкларга төренеп.

Ин изге теләкләр белән тормыш иптәшең, кызың, киявең, улың, киленең, оныкларың, кода-кодагыйларың.

* * *

Хезмәттәшебезне 55 яшьлек юбилее белән чын күңелдән котлыйбыз.

Үз эшегезне зур осталык, төгәл һәм күңел жылыгызны биреп башкаруыгыз, тырыш, көчле рухлы, кешелекле, гадел, ярдәмчел булуыгыз белән Сез коллективта зур ихтирам яуладыгыз.
Куркәм юбилеегыз белән котлап, Сезгә алдагы тормышыгыздан ямь табып, авырмый, кайгы-хәсрәт күрми, балаларыгызның, оныгыгызның куанычын, якыннарыгызның игелеген күреп тормыш иптәшегез Резеда белән тигез, бәрәкәтле мул тормыш телибез!

Хезмәттәш дус, туган көнгә
Якты кояш сибә нурын.
Без дә аңа кушылабыз,
Бәхетләрнең сезгә иң зуры.

Реклама

Сезне без бик яратабыз,
Гадел, тырыш булган өчен.
Һаман шулай гөрләп яшәгез,
Артып торсын яшәү көчегез.

Озак еллар бергә-бергә
Бүгенгедәй эшлик әле.
Бүгенге бәйрәм гомергә,
Истәлек булсын әле.

Иң изге теләкләр белән  ширкәт коллективы.

* * *

Әниебезгә 80 яшь тулды.

Кадерлебез! Тынгысыз җанлы, сабыр һәм кешелекле, ярдәмчел һәм кунакчыл, эчкерсез булуың, безнең шатлык-борчуларны йөрәгең аша үткәреп, киңәш-табыш, ярдәм итеп торуың өчен мең-мең рәхмәт, әни.
Сине чын күңелебездән туган көнең белән котлыбыз. Һәр туар таңың шатлык белән атсын, Аллаһ саулык-сәламәтлектән аермасын, бәрәкәтле озын гомер насыйп итсен, җан тынычлыгы, күңел күтәренкелеге юлдаш булсын сиңа, иңнәреңдәге шәфкать фәрештәсе беркайчан да ташламасын, балалар һәм онык-оныкчыклар бәхетенә сөенеп, кадер-хөрмәттә яшәргә язсын.

Әле һаман без дип яшисең син,
Күптән инде зурлар булсак та.
Аз булыр күк, Әнкәй, синең өчен
Нинди изгелекләр кылсак та.

Аллаһ сиңа сәламәтлек бирсен,
Сызламасын аяк-кулларың.
Чирне белмә, кайгы-хәсрәт күрмә,
Япь-яшь булып калсын күңелең.

Алгы көннәрдә дә бәхетебез
Булсын иде тулы, түгәрәк.
Синнән җылы алып һаман шулай
Гомер кичсәк иде бергәләп.

Иң изге теләкләр белән улың-киленең, кызларың-кияүләрең, онык-оныкчыкларың.

* * *

Хөрмәтле хезмәттәшебез! Сезне 60 яшьлек юбилеегыз белән котлыйбыз. Сезгә нык сәламәтлек, озын-озак игелекле гомер, киләчәктә үтәсе елларыгызга һәм юлларыгызга яктылык, гаилә шатлыгы, ак бәхетләр,балаларыгызның һәм оныкларыгызның күңел җылысын тоеп, игелекләрен күреп, бәхетле, озын гомер кичерүегезне телибез.

Хөрмәт белән хуҗалык коллективы.

* * *

Хезмәттәшебез көнне 60 яшьлек юбилее.

Хөрмәтле хезмәттәшебез! Сезне юбилеегыз белән ихлас күңелдән котлыйбыз! Без сезне киң күңелле, үз хезмәтен җиренә җиткереп башкаручы, балаларга төпле белем бирүче, тынгысыз, укытучылар арасында зур абруй казанган хезмәткәр буларак беләбез. Хезмәтебезгә ямь өстәп, авырмый, кайгы-хәсрәт күрми, озын гомер итүегезне, гел шундый кадерле булып, балаларыгызның игелеген күреп, иптәшегез Хәлил белән тигезлектә, хәерле гомер кичерүегезне телибез!

Сабыр да сез, гади, кешелекле,
Кылган эшегез- бары игелек.
Шатлыкларда үтсен сезнең көннәр,
Бәхетегез булсын гомерлек!

Иң изге теләкләр белән мәктәп коллективы.

* * *

Кадерле кешебез! Сине ихластан гомер бәйрәмең белән тәбрик итәбез. Син безнең өчен һәрвакыт ныклы терәк һәм үрнәк. Безне кайгыртып һәм ярдәм кулы сузып яшәвең өчен мең рәхмәт. Алдагы көннәреңдә һәр туар таң күңел көрлеге, тән сихәтлеге, бәхет-шатлыклар, куанычлы хәбәрләр генә алып килсен. Тормыш иптәшең белән тигез тормышта, муллыкта, балаларыгызның һәм оныкларыгызның игелеген күреп, уңышларына сөенеп, бәхетле гомер кичерүегезне телибез.

Бу гомерләр искән җилләр кебек,
Сизелмичә үтеп китәләр.
Гомер юлларыңда бәхет теләп,
Гел елмайсын якты иртәләр!

Иң изге теләкләр белән барлык туганнар исеменнән сенлең.

* * *

Әниебезгә 80 яшь тула.

Бала чагы юклык, ятимлек, сугышы чоры вакытына туры килеп, тормышның ачысын- төчесен күп күрә әниебез. Әти белән тормыш корып, 5 бала сөеп үстергән. Безнең шатлык- борчуларбызны йөрәгең аша үткәреп торуың өчен рәхмәт, Әни! Синең укыган догаларың безне бик күп еллар сакласыннар, якласыннар.
Сине чын куңелебездән туган көнең белән котлыйбыз. Саулык-сәламәтлек, бәрәкәтле, хәерле гомер, җан тынычлыгы, күңел күтәренкелеге телибез. Алдагы көннәреңдә кадәр- хөрмәттә яшәргә язсын.

Борчу күрмә, игелек күр һәрвакыт,
Тыныч торсын йөрәккәең көнозын.
Тоеп яшә дөнья матурлыгын,
Якыннарның күңел җылысын.

Иң изге теләкләр белән балаларың, кияү-киленнәрең, оныкларың.

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: