Эш хезмәтне саклаудан башланырга тиеш

- Хезмәт урыннарында булган күпчелек бәхетсезлек очраклары "кеше факторы" белән бәйле. Сер түгел, хезмәткәрләр еш кына куркынычсызлык техникасы кагыйдәләрен белмиләр яки белеп тә санга сукмыйлар, ә вазыйфалары буенча хезмәтне саклау процессына идарә итәргә тиешле белгечләр штат расписаниеләрендә юк. Кеше, сезнең кул астындагы хезмәткәрләр турында сүз барганда моңа салкын карарга ярамый. Бәхетсезлек очрагы килеп чыкканнан соң хаталарны төзәтүгә караганда, аны булдырмау яхшы, - диде координацион совет рәисе, район башкарма комитеты җитәкчесенең беренче урынбасары Илшат Галимуллин.

Районда 10 ай эчендә 4 бәхетсезлек очрагы теркәлгән. "Маяк" һәм "Дуслык" хуҗалыкларында сыер савучы, ә "Игенче"дә бозау караучы эш урынында аягын сындыра. "Якты юл" хуҗалыгында исә бәхетсезлек очрагы үлем белән тәмамлана. Бу көнне "Якты юл" җәмгыятендә газ белән эретеп ябыштыручының ярдәмчесе Нияз Әхмәров төзелеш буенча эшкә наряд ала. Торбаларны траншеяга салган вакытта "К-700" тракторы чүмесе астында калып, вафат була. Бүгенге көндә җинаять эше ачылып, тикшерү эшләре дәвам итә. Хуҗалыкка зур күләмендә штраф та салынган.

Әлеге бәхетсезлек очраклары буенча хуҗалык җитәкчеләреннән, куркынычсызлык һәм хезмәтне саклау инженерларыннан урыннарда җитди эш алып бару соралды. Хезмәткәрләргә медицина караулары үткәрү, махсус киемнәр һәм башка төр шәхси саклану чаралары белән тәэмин итү, махсус укулар оештыру, куркынычсызлык техникасы кагыйдәләренең төгәл саклануына ирешү инженерлар һәм профсоюз комитетларына таләп итеп куелды.

Фото: http://kolesa.kz