Хатынына ут төрткән

Калтасы районында 68 яшьлек пенсионер үзе белән гомер кичерүче 46 яшьлек ханымга ут төрткән.

Күпчелек фаҗигаләр нидән башлана? Әлбәттә, исерткеч эчемлекләр кулланудан!

Җинаять кылынасы көнне бу пар да сыйлы табын артында башта чөкердәшеп утырган. Тик чәркә артыннан чәркә бушата торгач, пенсионер картның, ни сәбәпледер, җене кузгалган. Ул, янында утыручы хатынның өстенә спирт сибеп, ут төрткән.

Мескен хатынның тәне бик нык пешкән. Аны дәваханәгә кем илткәнлеге хәбәр ителми. Тик менә ханымның гомерен табиблар саклап кала алмаган, чөнки аның тәненең 32 проценты янган булган.

Теге кансыз картка хәзер җинаяте өчен җавап бирергә туры киләчәк. Гомеренең соңгы елларын ул рәшәткә артында үткәрәчәк, дип яза Кызыл таң.

Фото: pixabay.com/ru