Эчкәч, искә эш төшә

Бу вакыйга агымдагы елның 20 июлендә була. Арбор авылында яшәүче бер мөхтәрәм шәхес ял итеп ала. Күпләр бездә ял иткәндә аракы кулланмаса, аның ялы ял булмый. Бу очрак та нәкъ шул аракыга бәйләнгән. Соңыннан беркетмәгә язганда, үзе күрсәткәнчә, 200 грамм аракы эчеп, кәефләнеп ала.

Кичен, сәгать җиделәрдә җиңел машинасына утырып, ниндидер эш табып, Чепья авылына юл тота. Әмма анда кадәр барып җитәргә насыйп булмый, ике авыл арасындагы юлда аны ЮХИДИ хезмәткәрләре туктата. Документларны тикшергәннән соң, шикләнеп, махсус приборга өрдерәләр. Ә ул зур микъдарда спиртлы эчемлек кулланганны күрсәтә. N. үзенең исерткеч эчемлек кулланганын яшерми, рәсми беркетмәгә имзасын куя.

Балтач җәмәгатьчелек судында бу эш каралганда, N. үзенең гаебен тулысынча таный. Аның бу гамәленә чын күңелдән үкенгәнлеген исәпкә алып, бер ел да алты айга транспорт белән идарә итү хокукыннан мәхрүм итәргә һәм 30 мең сум штрафка тартырга дигән карар чыгарыла. Карар үз көченә керде.