Казанда полицейский яшүсмернең кабыргасын сындыруда шикләнелә

(Казан, 19 июнь, "Татар-информ"). Татарстан башкаласында РФ Эчке эшләр министрлыгының Казан шәһәре буенча идарәсе патруль-пост полкы батальоны хезмәткәренә карата җинаять эше кузгатылган. 27 яшьлек полиция сержанты көч кулланып вазифаи вәкаләтләрне арттыруда (РФ Җинаять кодексының 286нчы маддәсенең 3нче өлеше) шикләнелә. Моның өчен аңа 10 елга кадәр ирегеннән мәхрүм ителү яный, дип хәбәр итә зыян күрүче вәкиле, Казан хокук яклау үзәге белән хезмәттәшлек иткән юрист Андрей Сучков.

Тикшерү версиясе буенча, агымдагы елның 25 маенда шикле, 15 яшьлек яшүсмерне муеныннан тотып алып, үзеннән читкә этеп җибәрә. Шуннан соң полицейский аның янына килеп, йодрыгы белән эченә суга. Яшүсмер полиция сержантына бернинди каршылык та күрсәтми. Хокук саклау хезмәткәренең физик көч куллануга нигезе булмый, дип Россия Тикшерү комитетының ТР буенча тикшерү идарәсе Казан хокук яклау үзәге шәрехләвен китерә. Зыян күрүченең 9нчы кабыргасы сынганлыгы һәм йөзендә, муен турысында гематомалар булуы теркәлә.

http://tat.tatar-inform.ru/

Фото: http://onmedik.ru/wp-content/uploads/2013/11/ushib-reber.jpg