Түтәлдән чәчәк өзгән өчен...

Тверьда дүрт яшькә кадәрге ятимнәр, шул исәптән инвалид һәм ВИЧлы сабыйлар яши торган “Теремок” махсус балалар йортының кече шәфкать туташы түтәлдән чәчәк өзгән өчен тәрбияләнүчегә суккан. Бу хакта “Подъем” басмасы хәбәр итә.

Бу хәлне шуннан үтеп баручы ханым күреп калган. Аның сүзләренә караганда, тәрбияче “бөтен көченә” өч яшьләр чамасындагы сабыйның яңагына суккан.

Учреждение хезмәткәре бу гамәлен малайның түтәлдән өченче тапкыр чәчәк өзүе белән аңлата. Аның фикеренчә, “бу ысул - нормаль күренеш”, һәм бала мондый җәзага лаек.

Әлеге басма хәбәр итүенчә, хезмәткәрне бурычларын тиешенчә үтәмәүгә бәйле рәвештә эштән куганнар, дип яза Кызыл таң. Зыян күргән малайның гомеренә һәм сәламәтлегенә берни дә янамый, диелә.

 
Фото: activityedu.ru

Автор: Зөлфия Фәтхетдинова