Балтачта атналык җыелышта ниләр хакында сөйләштеләр? (фото)

Бүген район башкарма комитеты җитәкчесе Айдар Хәйретдинов районның җаваплы җитәкчеләре белән атналык киңәшмә уздырды.

Көн тәртибендә Казанда ярминкә үткәрү, 9 май бәйрәменә әзерлек мәсьәләләре күтәрелде. Җиңү көненә әзерлек эшләрен озакка сузмый башларга, һәйкәлләрне төзекләндерү , митинг үткәрү тәртибен барларга дигән бурычлар йөкләнде.

Күптән түгел районыбызда узган «Созвездие-Йолдызлык» фестиваленең зона этабын оештыруга йомгак ясалды, кайбер оешма җитәкчеләренә Рәхмәт хатлары тапшырылды. Шулай ук хәрби хезмәткә чакыру, үзара салым мәсьәләләре каралды.

Районда төзелеш эшләре — үзәк хастаханә, Наз, Романтик лагере, Кенә мәктәбе ремонтлары, Сизнер авылында кибет төзелеше, күп фатирлы йортларга ремонт барышы турында информация тыңланды.

Террорга каршы көрәш чараларын үтәү турында район башлыгы ярдәмчесе Энҗе Гарипова чыгышы тыңланды.

Көн тәртибендә күтәрелгән һәр мәсьәлә буенча эзлекле эшчәнлек таләп ителә, алар һәрберсе районның киләчәген һәм халыкның уңайлы тормыш-көнкүрешен кайгырту максатыннан эшләнә.