Таузарда Азат Зыятдинов истәлегенә мемориаль такта ачылды (фото)

Бүген районыбызның күренекле улы Азат Зыятдинов истәлеген мәңгеләштерделәр. Туган авылы Таузарда башлангыч мәктәп-балалар бакчасында мемориаль такта урнаштырдылар. 

Азат Шәймулла улы химия өлкәсендә зур белгеч, техник фәннәр докторы, Татарстанның атказанган химигы, академигы, фән һәм техника өлкәсендә ТР Дәүләт премиясе лауреаты, Түбән Кама шәһәренең оешуына, аның тулы канлы тормыш белән яшәвенә күп өлешен кертеп, шәһәрнең мактаулы гражданины исемен алган, ике тапкыр Дәүләт Советы депутаты булган, шул ук вакытта милли җанлы, нечкә шигъри күңелле райондашыбыз иде.

Мемориаль тактаны ачу тантанасында Азат әфәнденең тормыш иптәше Сания, кызы Гөлнара, улы Нариман, якыннары, авылдашлары, укучылар катнашты.

Тантанада катнашкан район башкарма комитеты урынбасары Илһам Гайнетдинов чарада катнашучыларга һәм оештыручыларга рәхмәт белдерде.