Чиксез мөмкинлекләргә ия райондашларыбыз

Елның-елында 1-10 декабрь көннәрендә инвалидлар ункөнлеге үтә. Быелгы декада да гадәттәгечә зур чара белән башлангыч алды. Мөмкинлеге чикле, иҗат уты белән янучы райондашлар тамашачыларга "Бер күрешү - үзе гомер" дигән концерт тәкъдим итте.

Талгын көй астында Чулпан Габделганиева һәм Рузилә Гиниятуллина башкаруындагы бию белән башланган концерт мизгел эчендә тамашачыны үзенә җәлеп итте. Бер-бер артлы сәхнәгә күтәрелгән җырчы кызлар Рәзинә Төхвәтуллина белән Әнисә Фазылҗановага да алкышлар мулдан булды. Нәни Энҗе Галимуллинаның "Туган көн" шигырен зал тын да алмый тыңлады. Марс Сәләхетдиновның таяклар белән трюклар күрсәтүе залны тагын да җанландырып җибәрде. Наил Фәсыйховның моңлы җырлары, Мәгъмүрә Хөрмәтуллина, Чулпан Габделганиеваның шигырьләрен дә тамашачы җылы кабул итте.

Район мәдәният үзәге хезмәткәрләре тарафыннан бәйрәм күчтәнәче буларак тәкъдим ителгән биюләр, җырларны тамашачы яратып кабул итте. Ихлас котлаулар, бүләкләргә бик бай булды бу бәйрәм. Мөмкинлекләре чикле булып та чиксез мөмкинлекләргә ия райондашларыбызның талантларына, уңышларына ихластан сөендек,сокландык.

Калган фотоларны биредә карагыз: http://baltaci.ru/tt/gallery.html