Әтнә җырлый, Әтнә бии

Авылның күрке булган яңа салынган күпфункцияле үзәкне котларга республикабызның җыр һәм бию ансамбле коллективы ерак араларны якын итеп Әтнәгә килде. Кунакларны авыл халкы ипи-тоз белән каршы алды. Яңа клубта ансамбль солистлары мастер-класслар күрсәтте. Кичен исә яше-карты, туган-тумача, тирә-як авылларда яшәүчеләр коцертка агылды. Күңел түреннән чыккан моңнар клуб диварларына гына сыймыйча тирә-якка таралды. Күңелләргә үтеп керерлек җырлар, дәртле биюләрне тамашачы басып алкышлады. Әлеге концерт, чын мәгънәсендә җыр-моң бәйрәмен хәтерләтте. Шунысы мәгълүм, ул Әтнә авылы тарихына зур хәрефләр белән язылачак.