Балтач балалары “Пушкин картасы”н кулланырмы?

“Пушкин картасы” программасындада Россиянең барлык төбәкләрендәге мәдәни учреждениеләр катнаша. Мисал өчен, районыбызның берәр авыл мәктәбе укучысы шушы карта ярдәмендә Россиянең теләсә кайсы бер шәһәрендәге музейны карарга бара ала.

“Пушкин картасы”н “Дәүләт порталы” сайтында рәсмиләштерергә була. Әлегә карта виртуаль итеп кенә эшләнелгән, әмма киләчәктә аның пластик варианты да булачак. Билетны кеше үзенә генә сатып алырга хокуклы. Билетларны “Дәүләт порталы” аша сатып алырга мөмкин булачак.

Быел картага 3 мең сум акча күчереләчәк. Ул ел азагына кадәр тотылырга тиеш, чөнки калган сумма икенче елга күчми. Ә 1 гыйнвардан картага 5 мең сум салына һәм ул бер елга исәпләнә.

– Шәһәр җирендә мәдәни чаралар, учреждениеләр белән проблема күренми. Ә менә авылларда, районнарда туган якны өйрәнү музейлары, мәдәният йортларыннан тыш әллә ни сайлау мөмкинлеге юк диярлек. Бу мәсьәләне чишүнең ике юлы бар, - ди Татарстан мәдәният министры Ирада Әюпова. – Укучылар Казан, Чаллы, Әлмәт кебек шәһәрләргә йөри алачак. Кайбер очракларда труппалар авылларга, районнарга барып чыгыш ясаячак.