«Даур куара» чузъяське

Музей ке шуиськомы, тросэз син азязы пуктозы ӵужектэм ужкагазъёсты, шундыен бездэм яке тузонэн шобырскем вашкала арбериосты. Но мургес малпаськид ке, музей — со выжыосмылэн кыдёкысь чузъяськись куараоссы. Шор Кушкет шоръёзо школаысь этнографической музей но юнме шорысь «Даур куара» нимамын ӧвӧл, дыр.
Та музей сярысь ёрос газетамы гожъямы вал ини. 500 сюрс грант утыса, со али дыре выльдӥське. Таин вормонъёс ӧз йылпумъяське. Куарусён толэзьлэн нырысетӥ нуналъёсаз музейысьтымы 48 экспонатъёсмы «бадӟым сюрес вылэ потӥзы но вуизы» Казань Кремльысь «Хазинэ» национальной художественной галереяе. Туж бадӟым вормон луэ та «Даур куара»-мы понна.
15-тӥ куарусёнэ галереяын усьтӥськиз «Даур куара» шуыса ик нимаськись адӟытон, кудӥз сӥземын удмурт калыклэн мифъёсызлы но легендаосызлы, сямъёсызлы но улон йылолъёсызлы. Ужрадэз кутскиз куно пумитан гуръёсынызы но шулдыръяськонъёсынызы Кукмор ёросысь «Инвожо» фольклор ансамбль. Ӟечкылан кылъёссэс веразы Татарстанысь удмуртъёслэн НКА-зылэн кивалтӥсьсы А.С. Герасимов, Татарстан Республикалэн Президентэзлэн Департаментысьтыз йӧскалык политикая валтӥсь кенешчиез М.А. Иванова, Шор Кушкет шоръёзо школалэн директорез К.В. Грахов, «Даур куара» музейлэн кивалтӥсез Л.Г. Мамыкова. Экспозициын озьы ик люкамын Фиринат Халиковлэн, Менсадык Гариповлэн, Михаил Кузнецов-Казанскийлэн живописной но графической ужъёссы, кудъёсызлэн сюжетъёссы герӟаськемын удмурт калыклэн историенызы, соослэн калык лулчеберетэнызы. М.И. Кузнецов-Казанский, Татарстан Республикаысь Габдулла Тукай нимо Кун премилэн лауреатэз, калык художник но таӵе пумиськонлы тау карон кылъёссэ вераз.
Ми, Ӟаны школаысь дышетӥсьёс, нырысетӥосыз пӧлын дунъяны быгатӥмы адӟытонын луэм экспозициез. Шумпотон но данъяськон мылкыд пыӵа таӵе вормонъёс дыръя удмурт калыкмы понна но мылкыд сётэ вуоно ужъёслы. Оскиськом, таӵе ужрадъёс удмурт кылэз но калык лулчеберетэз ӝуто, азинскыны кужым сёто шуыса. Малпаськом, «Даур куара» музеез азьпалан эшшо но трос вормонъёс витё шуыса.
Та адӟытон Казаньын ужалоз 16-тӥ коньывуонозь. Мылкыд карисьёс быгатозы учкыны но дунъяны.