«Мудорвайлэн» кизилиосыз ворекъязы

Концерт огшокчемен ортчиз. Ма, нылпиослэсь концертсэс мукет сямен учкыны уг но луы, дыр. Кыӵе бен соос муспотонэсь, чырткемесь но устоесь! Кыӵе соос яркытэсь! Гужем возь вылысь вань чебер сяськаосты бичаса дасям сяська керттэт выллем. Котькудӥз ас сяменыз чебер: кин ке кылбур лыдӟыны усто, кыкетӥез — кырӟаны, нош куинетӥез — эктыны.

— Сюлмысь шумпотыса нылпиослэсь выступлениоссэс учкимы, — шуиз ёросысь исполнительной комитетлэн кивалтӥсезлэн воштӥсез Ильгам Гайнутдинов но, пиналъёслэсь устолыксэс пусйыса.

Кӧня ар ини «Мудорвай» вожвылъяськонэ мукет калыкысь нылпиос но пырисько. Та ас черодаз эшлыко кусыпъёслы, конкурслы паськыт вӧлмыны луонлык кылдытэ. Калыкъёс куспын эшлыко кусыпъёс, соослэн кулэлыксы сярысь ужрадын Ильгам Фидаелевич но вераз.

— Туннэ нуналэ йӧскалыкъёс куспын, нылпиос куспын эшъяськон ӧвӧл вылэм, асьмелэн вуономы кышкыт улсы шеде. <…> Гажано анай-атайёс, педагогъёс, тӥледлы вазиськонэ: азьланяз но ёросамы, элькунамы калыкъёс куспын, нылпиос куспын огмылкыдо, эшлыко улон понна луонлыкъёс кылдытыса, та эшлыко кусыпъёсты выжыысен-выжые выжтыны мед кылдоз вал шуыса мылкыд карем потэ, — шуиз со.

— Тани асьмелэн гала-концертмы ортчиз. Мон малпасько, со туж шулдыр ортчиз шуыса, со ваньмыз тӥляд ужды, — анай-атайёслы, дышетӥсьёслы, визьнодасьёслы вазиськыса веранзэ кутскиз «Кенеш» НКА-лэн тӧроез Ольга Пчельникова. — Мон тӥледлы ваньдылы сӥзисько та ужез азинтыны, нылпиослы удмуртлыкез пыӵатыны. <…> Оскисько, Казаньын ортчись ужрадын но асьмеос дано выступить каромы шуыса.

— Таяз аре та уже пыриськизы ёросысьтымы 200 пала нылпиос. Конкурс куинь зонаын ортчиз. Со сяна, 46 нылпи суредъя номинацие аслэсьтыз ужзэ лэзиз. Суредъёсъя йылпумъянъёс тодмо ӧвӧл на. Гала-концертэ пыриськиз 125 нылпи, — ватсаз на Ольга Мироновна.

Тодады вайытӥськом, туэ «Мудорвай» конкурс куатетӥзэ радъяськиз ини шуыса. Азьвыл аръёсы кадь ик пиналъёс кылбур лыдӟон, эктон, оген но коллективен кырӟан номинациосъя вожвылъяськизы.
Матысь дыре ёросысь тужгес устоосыз, тужгес кужмоосыз пиналъёс Казаньын выступить карозы. Оскиськом, соос республикаын но дано интыосты басьтозы шуыса.