Покчи Лӧзя нылпи сад бервыло ужаменыз шумпоттэ

Та чебер сямлы покчи лӧзяос но котькуд аре оскымон кылё. Али ку гинэ интыысь Лулчеберет юртын Покчи Лӧзя шоръёзо школалэн 2021-2022-тӥ дышетскон ар понна отчёт концертэз луиз (Та ӝытэ сцена вылын усто дышетскисьёсты — ёрос, элькун, улосвылкуспо олимпиадаосын но пӧртэм конкурсъёсын вормисьёсты, призёръёсты; спортъя азьветлӥсьёсты, школалэн улоназ мыло-кыдо пыриськись анай-атайёсты пусйизы, нылпиос анай-атайёссылы, песянай-песятайёссылы чебер кырӟанъёс, пуштросо кылбуръёс но шулдыр эктонъёс кузьмазы). Нош 24-тӥ куартолэзе Покчи Лӧзя Лулчеберет юртын эшшо одӥг туж сюлмо ужрад ортчиз: интыысь нылпи садын визьнодаськись пиналъёс но отын ужась коллектив ар ӵоже ужамзылы йылпумъян лэсьтӥзы, анай-атайёсты, песянай-песятайёсты но гурт калыкез рос-прос дасям пуштросъем концертэн шумпоттӥзы.

Вакчияк вераса, яркыт буёлъёсын, пиштӥсь кизилиосын ворекъясь концерт шуыны луысал та ужрад сярысь. Вуюись кадь чибор калык дӥсь, шулдыр крезьгур, капчи мылкыд, мусо пальпотонъёс… Тани таӵе кылъёсын валэктыны луысал та ӝытлэсь кылем огъя мылкыдэз. Нош концертэ лыктэм учкисьёслэн шумпотонэн тырмем синъёссы, таукарем кылъёссы та мылкыдэз эшшо но юнматӥзы.

Зэмзэ но, Покчи Лӧзя нылпи садлэн концертэз туж быгатыса, рос-прос малпаса дасямын вал. Шумпотымон, пиналъёс куинь кылын вераськыны но кырӟаны быгатэмзэс возьматӥзы, чебер калык эктонъёсын шумпоттӥзы. Таин валче Покчи Лӧзя нылпи садлэсь коллективзэ но кивалтӥсьсэ Лилия Даулатзяновна Низамоваез пусйыны кулэ. Этнокультурной компонентэн нылпи сад уг луы ке но, коллектив тырше йӧскалык визьнод сётонлы бадӟым саклык висъяны, удмурт, ӟуч но бигер кылъёсын ужрадъёс ортчытъяны. Та ужазы соос ӵемысь ёросысь лулчеберетъя йӧскалык огазеяськонъёслэсь представительёссэс но кыскыны тыршо. Кылсярысь, ёросысь удмуртъёслэн «Кенеш» НКА-зылэн кивалтӥсез Ольга Пчельникова но ӟуч огазеяськонлэн кивалтӥсез Анастасия Данилова Покчи Лӧзя нылпи садын котьку витем куноос луо. Тани та концертын но Анастасия Николаевна анай-атай комитетлэн нимыныз но, йӧскалык огазеяськонлэн нимыныз нылпи садлэн коллективезлы йӧскалык визьноданлы саклык висъямез понна таукылъёссэ вераз, азинсконъёс но выль вормонъёс сӥзиз.

Пусйыны кулэ, 30-тӥ куартолэзе ёросамы вуылэм дуно куноослэн но одӥгез дугдылоннизы Покчи Лӧзя нылпи сад луиз. Озьыен, возьматымон, данъяськымон ужъёссы вань.

Шумпотымон, та дышетскон арысен Покчи Лӧзя нылпи садлэн мерлыко вотэсъёсысь огинъёсаз иворъёс куинь — ӟуч, бигер но удмурт — кылын югдытӥсько. Та но анай кылъёсты гажан мылкыд пыӵатон ужпумен быдэстӥське, вылды. Озьыен, оло, дыр вуиз ини Покчи Лӧзя нылпи садэз но этнокультурной компонентэн визьнод сётон учреждениос пӧлы пыртыны?..