Хезмәт

Рэп — яшәү рәвешем

Хәзерге заманда яшьләр өчен бик күп уңайлыклар тудырылган. Бары тик үзеңне күрсәтә белергә генә кирәк. Әңгәмәдәшем Ленар Нәфыйков әнә шундыйлардан, үз тырышлыгы белән студия булдыручы һәм клиплар төшерүче сәләтле егет.

Реклама

- Ленар, иҗат юлың кайчан башланды һәм сине моңа нәрсә этәрде?
- Элегрәк мин музыкаль өлкәнең ни икәнен белми дә идем. Мәрхүм әтиемнең гитарада бик шәп уйнаганын исемә төшердем дә, әниемнән гитара сорадым. Махсус түгәрәктә уйнарга өйрәндем. Тора-бара: «Нигә үз җырымны яздырмыйм соң әле мин», дигән фикер барлыкка килде. Рэп стилен сайладым. Абыем Алмаз Миргалимов янына бардым. Көен яздык. Шулай итеп «Балтач - Салавыч» исемле җырым чыкты. Районыбызда ул хитка әверелде. Тиктормас иҗат юлым әнә шулай башланды.
- Җыр сүзләрен үзең язасыңмы, әллә берәр ярдәмчең бармы?
- Күбесенчә үзем язам. Күңелемә һәм көйгә ятышлы шигырьләр булса, башка кешеләрнекен дә сайлыйм. Кайвакыт уйланып та куям: «Кайдан килгән соң миңа бу язу-сызу сәләте?» дип. Мөгаен, әлеге сәләтем Рамазан абыйдан (Фәрзиев) күчкәндер.
- Клип төшерү идеясе кайчан туды?
- Андый хыял күптән бар иде миндә. Әмма клипны «тоттың да төшердең»гә генә нигезләнеп эшләп булмый. Публикага охшарлык итеп төшерү кирәк. Беренче клибым - «Туган ягым - Балтач» иде. Аны күпләр охшатты. Әле яңа гына «Минем күрше - Җәмилә» исемле клибым чыкты. Ул да популярлык казанды. Тиздән тагын бер иҗат җимешем дөнья күрәчәк.
- «Яшен Records» хакында берничә сүз.
- «Яшен Records» - минем тавыш һәм көй яздыру студиям, иҗат «фабрикам». Абыемның студиясе эшен туктаткач, әнием ярдәме белән үз студиямне булдырдым. Кемнәр мөрәҗәгать итә - шулар белән эшлим.
- Киләчәктә үзеңне рэпер итеп күрәсеңме? Әллә бу мавыгу гына булып калырмы?
- «Алдан кычкырган күкенең башы ярыла», - ди халык. Әлегә төгәл җавап бирә алмыйм. Вакыт үзе күрсәтер.
- Әңгәмәң өчен зур рәхмәт, Ленар. Иҗат уңышлары сиңа.

Теги: 250
Нравится
Поделиться:
Реклама
Комментарии (0)
Осталось символов: