Шәфкатьле дусларыма

Ильнур, 20 May 2013 - 04:33

2483

(Мәктәптә «Изгелек кыл» исемле шәфкатьлелек акциясеннән соң туган шигырь).

Сокланамын сезгә карап,
Энҗегә тиң сезнең йөрәк.
Нәни генә булса да ул,
Шәфкать уты яна дөрләп.

Чит хәсрәтне уртак итеп,
Игелекләр кыласыз сез.
Шәфкать орлыклары чәчеп,
Изгелекләр җыясыз сез.

Рәхмәт сезнең һәммәгезгә
Олы була белгән өчен.
Тамчылардан күлләр ясап,
Шатлык ясый белгән өчен.

Һәрбер кылган изге гамәл
Яхшылыклар булып кайтсын.
Нәни Мәрьям йөрәгенә
Сихәт, дәва алып барсын.

Миһербанлы күңелегез
Һәрчак җылы, нурлы булсын.
Рәхмәт, шәфкатьле дусларым,
Олы җанлы булган өчен.