Барлык телләр дә мөһим
Күптән түгел Чепьяда «Федераль дәүләт таләпләренә (ФГТ) һәм II буын Федераль дәүләт мәгариф стандартларына (ФГОС) күчү шартларында милли белем бирү киңлегендә тел дисциплиналарына укыту методикасы» дип аталган беренче төбәкара фәнни-гамәли семинар булып узды.
Биредә Татарстан Республикасының кайбер районнарыннан һәм шәһәрләреннән, Удмуртия һәм Мари Иле Республикаларыннан вәкилләр катнашты. Кунаклар иң элек ипи-тоздан авыз итте, аннан соң мәктәп фойесында укучылар башкаруында милли биюләрне тамаша кылды. Идел буе федераль университетының белемне күтәрү үзәге директоры Рәис Шәйхелисламов, икътисад, идарә һәм хокук институты мөгаллимәсе Зифа Зарипова, Мари мәгариф институтының мари филологиясе һәм мәдәнияте кафедрасы мөдире Елизавета Игнатьева чыгышы тыңланды. Телләрнең әһәмиятлелеге турында сөйләшкәндә Рәис Шәйхелисламов: «Туган тел яки рус теле кайсы мөһимрәк дигән сорау урынсыз. Телләрнең икесе дә мөһим. Әмма рус теле камилләшергә ныграк ярдәм итә», диде. Бары туган телеңне яратканда һәм аны камил белгәндә генә башка телләрне дә хөрмәт итеп була дигән фикерләр дә яңгырады. Гомуми җыеннан соң семинар үз эшен алты секциягә бүленеп дәвам итте. Мари балалар бакчасында ФГТның тормышка ашуы, ФГОСка күчү шартларында татар, удмурт, мари телләрен һәм әдәбиятларын укыту методикалары турында түгәрәк өстәл артында сөйләшенде.
