Өмет яшәтә

Кышкы каникулдан килү белән Балтач урта мәктәбендә акцияләр булып узды. Отрядта «яңа»ларның булуы, идеяләрнең күплеге иң элек күзгә «ташланды». Волонтерларның ниятләре Нияз Әхкямовка ярдәм итү. Әле кайчан гына актив спортчы булган Нияз бүгенге көндә урын өстендә ята. Әмма өметләр әле өзелмәгән. Германия клиникасында операция ясалгач ул һичшиксез мөстәкыйль хәрәкәтләнер, дип өметләнәбез. Ә бит чит илгә чыгу, документлар әзерләү генә дә нинди мәшәкатьле һәм акча таләп итә торган эш. Волонтерлар моны яхшы аңлый һәм шуңа да бераз гына булса да ярдәм итү теләге белән изге эшкә алындылар.
22нче гыйнвар көнне «Ниязга ярдәм ит» дигән акция старт алды. Акция барышында барлыгы 4 мең сум акча җыелды. Ә менә күптән түгел хәйрия акциясе Бөрбаш һәм Норма урта мәктәпләрендә үткәрелде. Волонтерлар бергә-бергә күп кенә проблемаларны да чишәргә була дигән өмет белән яна, эшли, яши.