Анайёсты данъязы

…Анай — ярдур нылпиослы,

Анай ке вань — мылкыд вӧл-вӧл.

Анай дыръя тросгес кужым но,

Пумыз но улонлэн ӧвӧл.

Ӵапак Александр Шкляевлэн та кылбур чуръёсыныз кутскем потэ веранме. Нош веран Вуж Кушкет гуртын Анайлэн нуналэзлы сӥзьыса радъям концерт сярысь.

Туж чебер концертэн шумпоттӥзы анайёссэс Кушкет гуртысь пиналъёс. Сыӵе синмаськымон ужрад дасямзы понна гуртысь клубен кивалтӥсьлы Щербакова Светлана Петровналы, Вуж Кушкет покчиёзо школаысь дышетӥсьёслы — Щербакова Светлана Ивановналы но Карабаева Светлана Михайловналы туж бадӟым тау. Мыло-кыдо тыршиллям соос концерт номеръёсты дасян бордын. Кырӟанъёс но эктонъёс сяна, сценка но дасяллям вал пиналъёс. Одӥг пиналэз но кур карыса кельтымтэзы, кинлы роль тырмымтэ, асьсэос геройёсты малпаса, котькудмылы тодмо луэм «Репка» калык выжыкылэз выль сямен пуктӥзы. Туж шулдыр вал. Щербакова Юля чебер кырӟасьмы но вань милям. Со но туж быгатыса кырӟаз. Нимысьтыз висъяса вераме потэ Балтасьысь Хасанов кузпалъёсты. Соос но туж чебер эктон кузьмазы. Утёд ке, Рустам Хасанов Вуж Кушкет клубын нылпиосын эктонъя кружок нуэ вылэм.

Анай-атайёс но палэнэ ӧз кыле: ческыт сиёнъёсын тырмытэм ӝӧк сьӧрын чай юон радъязы. Праздник нылпи дискотекаен йылпумъяськиз. Вань люкаськем адямиослы концерт туж кельшиз.