Балтачта “Алтын каләм” иясе бары берәү

Конкурста катнашучыларның эшләрен ачып карауга ук кайсының иҗат дөньясында гизүен, ә кайсының катнаштыммы катнаштым өчен генә шигырь һәм язмалар җибәргәне күренеп тора. Шунысы бигрәк тә гаҗәпләндерде, бер укучының язмасы минем “Хезмәт” газетасында басылып чыккан язмамны алып, шуңа үз фикерен өстәп, үзенеке итеп бирүе иде. Хөрмәтле укытучы һәм укучылар, киләчәктә мондый әйберләргә юл куймасагыз иде, чөнки жюрида да читтән килгән кешеләр түгел, ә районыбыз вәкилләре утыра.

Район яшьләр эшләре һәм спорт бүлеге белгече Айсылу Нуриева, район мәгариф идарәсе методисты Фидания Сабирова, район үзәк китапханәсе мөдире Резеда Зарипова һәм минем катнашудагы жюри ике дистәгә якын эш арасыннан иң яхшысы дип бары берне сайлап ала алды. Ә бит яшь үзенчәлекләре өчәү. Елдан-ел укучыларның иҗатлары көчсезләнә бара. Алар конкурска да ел әйләнәсе әзерләнәсе, иҗат итәсе урынга көне килеп җиткәч кенә тотына. Ләкин андый эшләр берничек тә җиңү яулый алмый.

Җиңүчеләребез бар, тик алар белән сез “Хезмәт”нең киләсе санында таныша аласыз.