Балтачта "Җәлил укулары" башланды

Гөлзидә Газизуллина, 30 октябрь 2019 - 12:16

2956

Бүген Балтач үзәк китапханәсендә II Халыкара “Җәлил укулары” әдәби бәйгесенә старт бирелде.

Исегезгә төшерәбез,чара быел икенче мәртәбә Бөтендөнья татар конгрессы, Татарстан Республикасы Мәдәният, Мәгариф һәм фән министрлыклары белән берлектә оештырыла.

Бәйге 7 номинациядән гыйбарәт: М.Җәлил шигырьләре татарча, русча, дөнья телләрендә, Яшь җәлилчеләр (катнашучылар Бөек Ватан сугышы турында: сугыш чорына кагылышлы вакыйгалар, фронтовиклар, тыл хезмәтчәннәре турында һәм башкалар) үзләре язган әсәр белән чыгыш ясый. Шулай ук бу елдан яңа номинацияләр дә өстәлә. Татар милләтеннән булган фронтовик язучылар әсәрләрен башкару. Әлеге номинациядә катнашучы үзенең туган төбәгеннән чыккан язучы-фронтовик әсәрләрен тәкъдим итәргә тиеш. Бу номинациядә татар һәм рус телендә чыгыш ясарга мөмкин. Күмәк башкаручылар өчен дә номинация булдырылды һәм бәйгедә татар милләтеннән булган фронтовик язучыларның әсәрләрен татар һәм урыс телендә башкарырга мөмкин. Номинацияләр яшь буенча төркемнәргә бүленгән. 4 тән 8 яшькә кадәр, 9 дан 13 яшькә кадәр, 14 тән 17 яшькә кадәр, 18 дән 25 яшькә кадәр.

Бүген район үзәк китапханәсенең уку залында 40 тан артык нәфис сүз остасы көч сынашты. Араларында тәүге тапкыр катнашучылар да, узган ел бераз чирканчык алучылар да бар. Бәйге башланганчы узган ел җиңү яулаган, Балтач данын республика сәхнәсендә таныткан гимназия укучылары Данил Садыйков белән Диләрә Муллагалиева башкаруында шигырләр тыңланды.