Балтась ёрос Гырон быдтон праздникез но «БиГерд» форумез ортчытыны дась

Туэ асьме ёросамы республика масштабен ортчоно удмуртъёслэн «Гырон быдтон» праздниксы сярысь трос верамын но гожъямын вал ни. Ужрадлэн программаеныз, ортчоно шудонъёсыныз тӥледыз тодматӥмы ни. Тодӥськом, ужрадэз вылӥ уровеньын ортчытон понна йӧн-йӧн дасяськоно, трос кужым поныса ужано. Та бордын ини олокӧня арняос ӵоже тыршо районысьтымы адямиос — кивалтӥсьёс но, завклубъёс но, библиотекарьёс но... Та адямиос «пуш паласен», асьмелы тодмотэм но адскымтэ чыры-пырыоссэ адӟо, вань кадь юанъёсты пыр-поч эскеро но асьмелы вунонтэм луись праздник дасяло. Ӵапак соослы ик, арлы быдэ праздник дасяса, Гырон быдтонэз адӟыны но уг кылды: кин концерт номер дася, кин шудонъёсты ортчытэ, кин куноосты пумита... Но соос уг ӝожтӥсько, соослы таӵе бадӟым уж оскемын ук. 

Мар верало асьсэос организаторъёс Гырон быдтон сярысь 
Нырысь ик кыл сётӥмы «Кенеш» НКА-лэн председателезлы Никитин Владислав Валентиновичлы: 
— Ужмес капчи шуыны уг луы, кылкутонэз трос. Но ватытэк вераме луэ, Гырон быдтонлы вань кужмысь дасяськиськомы шуыса. «Кенеш» НКА-лэн членъёсыныз но пумиськонъёс ортчытъямы, али но ортчытъяськомы. Котькуд чыры-пырызэ но лыдэ басьтыса, праздникез радъяськомы. Тау Леонид Дмитриевичлы, со тросэныз мыным юрттэ, кивалтӥсьёсмы но сюлмасько, пумиськонъёсамы пырисько, ваньмыныз юртто. Соин но Гырон быдтонмес умой ортчытомы шуыса оскисько. 
Кивалтӥсьлэн таӵе верам кылъёсыз оскыто, праздник зэмзэ но умой но вылӥ уровеньын ортчоз шуыса. 
«Чеберина» но «Удмурт батыр» конкурсэ пыриськись егитъёс но ини кӧня ке арня ӵоже конкурслы дасясько. Соослы, устолыкъёссэс возьматыса, районмылэсь данзэ утьыны кулэ луоз. 
Тани мар вераз Людмила Трокова, одӥгез «Чеберина» конкурсэ пыриськись нылаш: 
— Мон туж шумпотӥсько, мыным та конкурсэ пыриськыны шуд усиз шуыса. Ольга Плотниковалы бадӟым тау шуэме потэ — со мыным та вожвылъяськонэ пыриськыны ӵектӥз. Та конкурсэ пыриськыны оскемды понна ваньдылы но тау, тӥ соин мыным бадӟым кужым сётӥськоды! Мон аслам национальностеным, аслам калыкеным туж данъяськисько. Данъяськисько, мон удмурт шуыса! Егитъёслы асьсэлэсь быгатонлыкъёссэс, устолыксэс возьматыны луонлыкъёс кылдытэмзы понна но пумтэм тау. Оло, кин ке таӵе конкурсъёсы пыриськоно-а, ӧвӧл-а шуыса но малпаське, дыр. Соослы юн оскыса вераны быгатӥсько: пыриське! Та ведь асьме понна выль мылкыдъёс басьтыны, выль тодматсконъёс но бадӟым опыт люканы юрттэ, озьы ик выль перспективаос но сётэ. Нылъёс, асьтэлы оске, тӥляд соку ваньмыз пӧрмоз! 
Удмуртъёс гинэ ӧвӧл, Гырон быдтонэ мукет калыкъёс но арлы быдэ шумпотыса ветло но витё. Кылсярысь, Ципьяысь Гульсима но Ильсур Камаловъёслэн семьязы. Тани мар шуо кузпалъёс: 
— Туж яратӥськом Гырон быдтонэз. Удмуртъёслэн костюмъёссы гинэ но ма сыло! Макем соос чебер! Кыӵе тунсыко соослэн традиционной шудонъёссы, ческыт национальной сиёнъёссы. Кыӵе соос быгатыса шулдыръясько, экто, кырӟало! Удмуртъёсын огазе эшлыко одӥг гуртын улӥськомы бере, тодӥськомы, соос шара, со дыре ик каньыль адямиос шуыса. Котькуд уж борды но басьтӥсько, шулдыръяськонзэс но уг вунэто. Праздникзэс но умой-умой радъяло котьку. Огъя вераса, Гырон быдтон арлы быдэ но, ӟучъёс верамъя, «на ура» ортче. 
Гырон быдтон сяна, та арняе районамы нош одӥг бадӟым ужрад ортче — «БиГерд» форум (28-тӥ июне усьтӥськиз но Гырон быдтонозь кыстӥськоз). Россилэн пӧртэм регионъёсысьтыз егитъёс та форуме вуизы (70-лы матэ адями). Та форуме мон ачим но пыриськисько, соин ик форум аслэсьтыз ужзэ али кутскиз гинэ ке но, егитъёсын тодматскыса но вераськыса вуи ни. 
Владимир Михайлов, Татарстан, Кукмор ёрос: 
— Форум сярысь мон удмуртъёслэн НКА-зылэн исполнительной директорезлэсь, Марина Ивановалэсь, тодӥ. Ми соин ӵош ужамы — кӧня ке дыр ӵоже мон Татарстанысь удмурт егитъёслэн огазеяськонзылэн кивалтӥсез луиськем вал. Та форумлэсь проектсэ кылдытӥмы, нимзэ но малпамы. Нырысетӥез форум, озьы ик Гырон быдтон праздник но, 2017-тӥ арын Менделеевскын ортчизы. Мыным личной обстоятельствоосын сэрен та ужысь кошкыны тупаз. Озьы ке но, али дыре Калык Эшъяськон

юртысь активист кадь иворъёсын тунсыкъяськисько, котькыӵе ужрадъёсы пыриськыны тыршисько, егитъёсын но кусып возьыса улӥсько. Форум сярысь верано ке, туэ нырысьсэ пыриськисько, ма Гырон быдтонын но кык пол гинэ луэме вань. 
Мария Булдакова, Удмуртия, Балезино ёрос: 
— Мон асьме ёросысьтымы «Дружба» Культура юртын художник-постановщик луыса ужасько. Проектированиен вырисько. Огдыре куинь вылӥ тодон-валан сётӥсь юртъёсын дышетскисько. Финн-угор но скандинав мифологиен тунсыкъяськисько. Мынам анае удмурт, нош атае эстон, но жаляса верано, атаен кема ӵош улыны ӧз кылды, соин ик эстон кылэз уг тодӥськы... Нош тани удмурт кылэз тодӥсько, ваньзэ валасько, семьяын ӟуч кылын вераськыса будӥ ке но. Та форуме тунсыкъяськемысь пыриськоно кари, малы ке шуоно мон котьку аслым приключениос утчасько. Форумлэн валтӥсь темаез но мыным матын луэ, соин но ваньмыз кельшоз шуыса оскисько. Мон удмурт ук, пичиысен кылэз ӧй ке но тоды, ачим кулэ карыса дышетски. Со мыным туж тунсыко, таинственной потэ. 
Форуме палэнысь лыктэм куно егитъёс сяна, асьме егитъёсмы но трос пырисько. Соос понна та форуме пыриськон тужгес но шумпотымон шуыса валай, малы ке шуоно ужрад асьме ёросамы ортчоз. Нош аслад ёросад, тодмо визькылэз воштӥд ке, «борддоръёсыд но юртто» ук. 
Ксения Никитина, Ципья шоръёзо школа: 
— Анай кылъя дышетӥсьёсы ӵектӥзы та форуме пыриськыны. Форум, нырысь ик, герӟаськемын мынам национальностеным — та мон понна ас калыкелэн сям-йылолъёсыныз мургес тодматскыны нош одӥг луонлык сётэ. Кыкетӥез, форумын, малпасько, туж тунсыко дырмес ортчытомы но асьмелы выль юлтошъёс шедьтомы шуыса. 
Форумез нырысь «Романтик» лагерьын ортчытыны малпамын вал ке но, берло Покчи Лӧзя школае выжтоно луиз. Соин сэрен та школалэн директореныз, Гарипов Эмиль Наилевичен но вераськимы. Тани мар со шуиз: 
— Школамы куноосты пумитаны дасяськиз. Изён интыос радъямын — кроватьёс, валес котыръёс — ваньмыз вань. Форуме пыриськисьёслы компьютерной класс но ӵектэмын. Душ но радъямын, соин ик егитъёслы вань каньыллыкъёс кылдытэмын шуыса верай ке, янгыш уз луы. 
Озьыен, та нуналъёсы районамы бадӟым ужрадъёс ортчозы, соин трос куноос но витисько. Оскисько, Гырон быдтонмы но, «БиГерд» форум но куноослы вунонтэм мылкыдъёс кузьмалозы шуыса. Нош вуоно номерын Гырон быдтон сярысь но, форумлэн ужамез сярысь но пыр-почгес лыдӟыны быгатод.