Бәйлиләр, чәй эчәләр, күнегүләр ясыйлар. Кайда дисезме? (+фото)

Куныр мәдәният йорты һәм китапханәсендә “Оста куллар” түгәрәге эшләп килә. Җитәкчеләре Разия Закирова белән Гөлназ Шакирҗанова. Кышкы озын кичләрне файдалы һәм күңелле уздыру максатыннан, түгәрәккә йөрүче Тәгъзимә Сәгтдинова һәм Гөлшат Шәрәфетдиновадан мәчет өчен эскәмияләргә, урындыкларга җәймәләр бәйләргә дигән тәкъдим керә. Калганнар  әлеге идеяне күтәреп ала. Бәйләр өчен җепләрне түгәрәккә йөрүчеләр үзләре алып килгән, мәчет тә ярдәм иткән.

–Киләчәктә дә бу эшне  туктатмаска исәп. Максатыбыз кул эшләренә яшьләрне дә тарту, алар белән  башмаклар, пинеткалар бәйләргә өйрәнәчәкбез, – ди Гөлназ Шакирҗанова.

Эшләп кенә калмыйлар, Гөлшат Шәрәфетдинова ял минутларында һәрбарчасын үлән чәйләре белән сыйлый,буыннарны язып җибәрер өчен төрле күнегүләр дә ясата икән.