Чепьялылар "Табылдык" тапканнар (видео)

Безнең Чепья авылы да читтә калмады. Калырлыкмыни, хәзер бит бездә махсус белемле яшь белгеч эшли башлады. Башка авыллардан аермалы буларак әле безнең як сәхнәләрендә куелмаган, китапларда басылмаган әсәр сәхнәләштерәсе килде үзешчәннәрнең. Эзли торгач табылды - "Табылдык".

Быел көз көне Тәрхән авылың бердәнбер кешесе вафат булгач минем күңелем бик әрнегән иде. Бер кешесе булса да авыл яши иде әле, ә хәзер авыл юк. Бер уйласаң, шул гади бер авыл кешесе авылны яшәтеп торган бит!

Без сайлаган спектакль дә нәкъ менә шул хакта булды. Дүрт карчык, бер бабай гомер иткән, почтальоннан башка беркем аяк басмаган авылда кунакка кайткан онык капчык таба. Капчыкка "табылдык" дип исем дә кушалар. Капчыкта ни бар, табылдыкның авылга берәр файдасы-зыяны булырмы, бу хакта беләсегез килсә, Рәмзия Хөсәенованың "Табылдык" спектаклен карарга ашыгыгыз. Бу араларда якын-тирә авылларда спекткальне күрсәтү планлаштырыла. Спектакльне сәхнәгә Р.Әүхәдиев куйды, рольләрне З.Зиатдинова, В.Әхмәтҗанова, Г.Животникова, Ә.Сәләхова, Е.Михайлова, В.Нәбиуллина, К.Шәйхетдинов, Ә.Рәхмәтулина, Р.Әүхәдиев башкардылар.

Авыл халкы үзешчәннәрнең уенын бик җылы кабул итте, уйланып та, көлеп тә кинәнде тамашачы.

Гөлсинә Животникова,
Чепья авылы.

Видео: vk.com