Эшебез дәвамлы булса гына...

Бу көннәрдә районыбызда халкыбызның милли бәйрәме – Сабантуйлар башлана. Татарлар гына түгел, бу бәйрәмне башка милләт халыклары да ел да сагынып көтеп ала. Милләтләр дуслыгына иң зур дәлил бу. Бүгенге көндә районыбызда 33 меңгә якын кеше, уннан артык милләт вәкиле яши. Районда халыкның 85 процентка якыны – татар, 12 процентка якыны – удмурт. Бердәнбер мари авылы бар. Элек-электән килгән дөрес тәрбия нәтиҗәсендә, төрле милләт вәкилләре тату гомер кичерә. Удмурт, марилар да татарчаны яхшы белә.

Узган ел республикабызда «Туган телләр һәм халык-лар бердәмлеге елы» дип игълан ителде. Туган телне саклау һәм үстерү һәрвакыт мөһим мәсьәлә булып торды һәм тора, чөнки телнең яшәеше һәм үсеше халыкның аны көндәлек тормышта ни дәрәҗәдә куллануына бәйле. Шуңа да районыбыз мәктәпләрендә, балалар бакчаларында милли белем һәм тәрбия бирүне тиешле югарылыкка күтәрү максат итеп куела.

Районыбызда 3820 укучы балага 29 мәктәптә татар, 8 мәктәптә рус телендә белем һәм туган телләрендә тәрбия бирелә. 2 мәктәптә – мари, 7 мәктәптә удмурт телләре туган тел буларак укытыла. Балтач гимназиясе татар милли мәгариф үзәге буларак эшли башлады.
Туган телләр һәм халыклар бердәмлеге елының дәвамы буларак, быел илебез күләмендә Мәдәни мирас елы игълан ителде. Киләчәккә ниятләгән эшләребез байтак. Һәр башкарган эшебездә, уздырылган чараларда халкыбызның милли кыйммәтләрен, мәдәни мирасыбызны саклап, алга куелган бурычны тиешле дәрәҗәдә үтәрбез дип ышанам.