“Факел”лылар "Калейдоскоп"тан җиңү белән кайтты

«Факел» клубының активистлары Илүзә Разыкова җитәкчелегендә Сосновый Борда узган "Калейдоскоп" республика фестиваленә катнашып кайттылар.

Биредә узган һәр көн катнашучылар өчен онытылмаслык хис-кичерешләр бүләк итте. Балтачлылар республикабызның башка район һәм шәһәрләреннән килгән егет-кызлар белән танышып, яңа дуслар таптылар. Оештыручылар конкурста катнашучылар өчен бик матур бәйрәм оештыру өчен тырышканнар һәм укучылар аны бик зурдан бәяләделәр.

Безнең район данын якларга барган кызлар һәрбер чарада актив катнашып, өйгә эшне югары дәрәҗәдә күрсәтеп, жюри әгъзаларыннан югары бәя алдылар. Тырышлыклары да юкка булмады аларның, районыбызга җиңүчеләр буларак кайттылар. “Факел”лыларны чираттагы җиңүләре белән ихластан котлап, киләчәктә дә зурдан-зур уңышлар телибез.