Гөлнара Гарипова Пензада булып кайтты

Оешма әгъзалары татар хатын-кызларының тормыштагы ролен, кул эшләрен, яшәү рәвешен һәм гореф-гадәт, йолаларыбыз сакланышын барлый, өйрәнә, элемтәләр ныгыта, тәҗрибә уртаклаша. Менә шундый максаттан 16 , 17, 18 декабрь көннәрендә Балтач районының "Ак калфак" оешмасы рәисе урынбасары Гөлнара Гарипова эшлекле сәфәр белән "Ак калфак" Бөтендөнья татар хатын-кызлары иҗтимагый оешмасы рәисе Кадрия Рәис кызы Идрисова җитәкчелегендәге делегация составында Пенза өлкәсендә булып кайтты. Ул "Әбикәй-матуркай" бәйгесен тамаша кылды. Аннан алган тәэсирләрен безнең белән дә уртаклашты:

"Пензаның Киров исемендәге мәдәният сараенда Пенза өлкәсе татарлары өчен зур вакыйга булды. Өлкәнең татарлар яшәгән барлык районнарыннан үзләренең гаиләләре һәм җанатарлары белән әбиләр "Әбикәй-матуркай" бәйгесенә килгәннәр иде. Аларга биремнәрдә оныклары, уллары яки кызлары булышты.

Пензада 90% рус халкы яши, 10 % татарлар. Пенза өлкәсендә 52 генә татар авылы бар. Шуңа да карамастан, үз милләтен яклап, үз телен саклап төрле чаралар, бәйгеләр уздыралар. Үз милләте өчен янып "Без - татарлар", дип яшәүләре сокландырды", - диде Гөлнара Гарипова.