«Илһам» Бөтенроссия яшь язучылар бәйгесе

Мәгариф һәм фән министры Энгель Фәттахов билгеләп үткәнчә, сәләтле балаларны, аларның туу, яшәү урынына карамастан, вакытында күреп алу мөһим. Шундый ысулларның берсе - "Илһам" конкурсы.
Конкурс республикада 3 ел уздырыла, анда катнашучылар саны да елдан-ел арта. Беренче елны бәйгедә катнашуга берничә йөз гариза тапшырылган булса, быел - 2,8 меңнән артык укучы катнашкан.

Бәйге өч этапта үткәрелә: катнашучыларның иҗат әсәрләрен кабул итү, эшләрне экспертлар тарафыннан тикшерү һәм зона этабы - Татарстан Республикасының районнарында экспертлар һәм балалар катнашында бәяләү.
Эксперт төркеме читтән торып үткәрелгән I турда 300 хезмәтне сайлап алган булган. Ә Арчадагы зона турына исә Балтач районының Нөнәгәр һәм Яңгул мәктәпләреннән 7 укучы катнашкан иде. Аларның барысын да бәйгенең йомкалау тантанасына «Пирамида» мәдәни-күңел ачу комплексына чакырдылар.

Сәхнәгә бүләкләнергә чыгучылар арасында Нөнәгәр мәктәбе укучылары да (укытучылары Рәзинә Гыйльфанова ) бар иде. «Яшь драматург» номинациясендә Зөлфинә Гыйльманова - 2, «Яшь прозаик» номинациясендә Гүзәл Мәҗитова 3 нче урын яулап, Мәгариф һәм фән министрлыгының дипломнарына һәм бүләкләренә ия булдылар.

Шунысын да әйтеп үтәргә кирәк: бәйгегә районыбызның төрле мәктәпләреннән 75 эш (проза, поэзия, драматургия жанрларында) тәкъдим ителгән булуына карамастан, икенче ел рәттән инде Нөнәгәр, Яңгул мәктәпләре укучылары уңышка ирешәләр.