Китапханәчеләргә дә максат-бурычлар йөкләнде (фото)

Иң беренче чиратта 2016 елда төрле конкурс, бәйгеләрдә уңышлы чыгыш ясаган авыл китапханәчеләренә грамоталар тапшырылды. Шеңшеңәр авылы китапханәчесе Зөлфия Казанда белем үстерү курсларында алган мәгълүматны хезмәттәшләре белән уртаклашты. Үзара һәрдаим эшләнеп килүче әлеге белем белән уртаклашу дәресләрендә китапханәчеләр төрледән-төрле яңалыклар белән танышып, үзләренең эшләренә кирәкле һәм файдалы юнәлеш, ысулларны да аерып алалар.

2017 елга китапханәчеләр алдына юбилейларын билгеләп үтүче райондаш язучылар, шагыйрьләр белән буктрейлерлар эшләү максаты куелды. Алар укучылар өчен кызыклы һәм мавыктыргыч булырга тиеш. Китапханәче эше беренче карашка гына җайлы кебек тоела, ләкин аларның да эшен тавык чүпләп бетермәслек. Төрле-төрле темаларга кагылган конкурслар, бәйрәмнәр үткәрү, аларга халыкны җәлеп итә алу ... - болар барысы да иҗат дөньясында кайнап яшәүче китапханәчеләрнең төп эшләре. Аларга әлеге иҗади хезмәтләрендә уңышлар теләп калабыз.