Орда өлкәннәргә хөрмәт һәрчак зурдан

Өлкәннәр!.. Олы кешеләр!.. Күпме мәгънә табып була бу сүзләрдән. Элек-электән үк олы кешеләр тормышның, яшәешнең нигезен тәшкил иткәннәр: намуслы балалар үстерү, аларның бәхете өчен көрәшү, табыннарыбыз мул, көннәребез уң булсын өчен башкарган барлык эшләр дә алар кулы аша үткән.
Бөтен кешелек дөньясына ямь бирүче, елмаюлары белән иркәләүче, җылы карашлары белән назлаучы, акыллы фикерләре белән оныкларына юл күрсәтүче сөекле дәү әниләрен өлкәннәр көне белән котлау өчен Ор балалар бакчасы коллективы үзләренә кунакка- бәйрәм тамашасы карарга чакырды. Дәү әниләргә "Әбиемнең серле сандыгы" дип исемләнгән музыкаль тамаша күрсәтелде.

Әбиләр бик рәхәтләнеп үзләренең оныкларын карап утырдылар. Бәйрәмнең икенче өлеше табын артында дәвам итте. Дәү әниләр үзләренең оныклары белән корбан ашыннан авыз иттеләр һәм үзләре алып килгән күчтәнәчләр белән чәй эчтеләр.