Сары яфрак, сагыш төсе диләр

Сары яфрак, сагыш төсе диләр,
Кара төстә икән кайгылар.
Ак төсләрне, бәхет төсе диләр,
Ак яфраклы агач кайда бар?

Ак яфраклар түшәп чыгар идем,
Җир йөзендә барлык юлларга.
Кара кайгыларга урын бетсен,
Юл калмасын начар уйларга.

Ап - ак булыр иде уй - хыяллар,
Агарыр күк безнең күңелләр
Без бит әле аның кадәр бозык,
Һәм алай ук начар түгелләр.

Ак юллардан ияртеп барыр кеше,
Кирәк әле безнең халыкка.
Ә бүгенге көндә без ошыйбыз,
Башы череп барган балыкка.

Таркалмаска, черемәскә иде,
Агартырга иде дөньяны,
Тормыш дәвам итсен, туктамасын,
Чиста булсын иде дәвамы.

Вагыйз Гыльмуллин.