Талантлар бар һәм бик күп

Әлеге мәдәни чарага районыбыз мәктәпләреннән генә түгел, Арча районыннан да укучылар килгән иде. Барысы 140 конкурсант катнашырга теләк белдереп, биш номинациядә көч сынашты. Аларның эшләрен мәртәбәле жюри әгъзалары: ТР Язучылар Берлеге әгъзасы, шагыйрә, Бөтендөнья татар конгрессы башкарма комитеты хезмәткәре Шәмсия Җиһангирова, Татарстанның халык артисты, якташыбыз, Түбән Кенә авылы кызы Римма Ибраһимова, Татарстанның атказанган мәдәният хезмәткәре Радик Михайлов, Кенәбаш авылы егете, җырчы Рафил Җәләлиев бәяләде.

Һәрбер бала үзенчә талантлы булуын бу чарада төрлечә күрсәтергә тырышты. Нәфис сүз сөйләүче балалар арасында сәнгатьле сөйләмнән кала, үз-үзләрен тотышлары, мимикалары белән аерылып торучылары да бар иде. Бигрәк тә Чепья мәктәбендә белем алучы Әдилә Рәхмәтуллина башкаруындагы «Сак-Сок» бәете таң калдырды. Арча районы Носы мәктәбе укучысы Алина Егорова да «Кәҗә белән Сарык» әкиятен оста башкарды. Шеңшеңәр мәктәбендә белем алучы Чулпан Нәҗипова чыгышы әсир итте.
Каушап, сүзләрен оныткан балалар да булды, тамашачы аларга да көчле алкышларын жәлләмәде. Конкурста үзләре язган шигырь белән чыгыш ясаучылар да аз түгел иде, аларга жюри әгъзалары югары балл куйды. Һәрбер чыгыштан соң балаларга сертификат һәм дисклы китап бүләк ителде.

Фестиваль балаларның талантын ачу, укучыларның башкару сәләтләрен үстерү, татар милли музыкасы аша укучыларга мәдәни һәм әхлак тәрбиясе бирү максатыннан үткәрелде.

Нәфис сүз номинациясендә Шеңшеңәр урта мәктәбеннән Чулпан Нәҗипова һәм композиторлар әсәрләре, татар халык җыры, вокаль ансамбль, фольклор (җырлы-биюле композиция) номинацияләре берләштерелеп, алар арасыннан Субаш мәктәбеннән Игорь Иванов Гран-прига лаек булдылар. Калган җиңүчеләребез дә бүләксез калмады. Көне буена сузылган әлеге конкурстан балалар шатлыклы хисләр белән таралышты, шул ук вакытта чыгышларыннан риза булмыйча, үз-үзләренә үпкәләүчеләр дә бар иде.

Әлеге чарадан фотолар биредә урнаштырылды: http://www.baltaci.ru/gallery