"Татар кызы" конкурсының финалында Татарстан районнарыннан 12 кыз катнашачак

(Казан, 10 сентябрь, "Татар-информ"). 12 сентябрь көнне Татар дәүләт филармониясе сәхнәсендә Республика районнарыннан һәм шәһәрләреннән килгән 12 кыз "Татар кызы" конкурсының финалында көч сынашачак. Җиңүче Ижевскида узачак бәйгенең халыкара этабында республика данын яклаячак, дип хәбәр итә Бөтендөнья татар конгрессы матбугат хезмәте.

12 сентябрь көнне филармония сәхнәсендә «Казан» бию ансамбле, Салават Миңнеханов һәм Гүзәлем дуэты һәм татар эстрадасының башка вәкилләре, шулай ук Башкортстан Республикасының яшь башкаручысы Ренат RNT чыгыш ясаячак.

Ике атна дәвамында катнашучылар үзләренең белемнәрен, бию, вокал күнекмәләрен һәм сәхнә сөйләме сәнгатен күрсәтү өчен актив рәвештә финалга әзерләнделәр.

• Республика конкурсы өченче тапкыр үткәрелә.
• Быел «Татар кызы»ның халыкара этабы 27 сентябрьдә Ижевскида узачак.  

Фото: Рамиль Гали