Яшә, әти...

Гомер буе көчле булган әти
Картайдың шул бик тиз, кинәттән.
Тормыш дилбегәсе кулдан төшкән,
Дәрт тә ташып тормый беләктән.

Чир шаукымы көчен тартып алган
Безгә терәк булган иңнәрдән.
Бары җиңелмәгән йөрәк калган
Егәр ташып торган көннәрдән.

Картайдың шул вакытыннан алда.
Гомер шундый: узмый торалмый...
Тик күңелдә син һаман да көчле,
Чөнки әти көчсез булалмый.

Тормыш йөген тартыр гайрәт бирә
Синең барлыгыңны белү дә.
Яшә, әти, безнең өчен бәхет,
Тулы бәхет "әти" диюдә.

Алсу Идрисова