Язмыш дигән диңгез

Ильнур, 25 июнь 2015 - 09:03

2568

Дулкын кочагында ялгыз калган Йомычкадай тоям үземне. Усал язмыш җиле төрле якка Куып сыный кебек түземне.

Дулкыннары кайчак бигрәк биек,
Кыя кебек килә каршына.
Котылырга һич әмәл юк кебек,
Себереп түгәр кебек барсын да.

Төпкә тартып кинәт йотмаса да,
Бар бит әйләндереп каплавы.
Тыныч көндә кайчак давыл куба,
Кыен сине, диңгез, аңлавы.

Синдә куәт, синдә никадәр көч,
Йомычкадай безне кагасың.
Дулкыннарың тирбәләләр уйнап,
Дулап җанга кайгы саласың.

Язмыш дигән диңгез кочагында
Йөзәм мин дә "жиңнәр сызганып".
Давыллардан, упкыннардан сакла,
Куйчы, язмыш, кайчак кызганып!