Югары Субаштан Валерий Семёнов: “Матур яшибез, тыныч булсын дөньялар!”

Ильнур, 5 апрель 2015 - 05:34

2322

Югары Субаш халкы - элек-электән моңлы, җырлы-биюле халык. Алар гореф-гадәтләрне онытмыйлар, аларны саклап, яшь буынга җиткереп баралар. Әле кайчан гына укытучылар коллективы зур концерт куеп, халыкны матур ял иттергән иде.

Югары Субаштан Валерий Семёнов: “Матур яшибез, тыныч булсын дөньялар!”

Җәмгыять рәисе Рамил Наилевич та бик кешелекле җитәкче булды. Төзелеш эше белән бергә кешене матур итеп ял иттерә белә. "Кышны озату" бәйрәмен дә истә калырлык, күңелле итеп оештырды. Түбән Каманың "Мунча ташы" килеп халыкка бушлай тамаша күрсәтеп китте.

Инде 27нче март көнне Субаш мәдәният йортының драма коллективы Әмир Камалиевның "Итәкле кияү" әсәре буенча куелган "Кырыкта да кытыклый" комедиясен сәхнәләштерде. Җитәкчесе мәдәният йорты директоры - Хәлил Фәизов. Рольләрне Альберт Николаев, Геннадий Дмитриев, Ильвир Васильев, Гөлнар Габдрахманова һәм Хәлил Фәизов башкарды.

Халыкның байтагы Балтачтагы концертка китүгә карамастан, зал шыгрым тулы иде. Г. Камал театры артистлары килгән диярсең. Артистларыбыз шулкадәр җиткереп, оста итеп, рольгә кереп уйнадылар. Халык бертуктаусыз көлеп, кул чабып, аларны алкышларга күмде. Авыл җирлеге башлыгы Радафил Рәхимҗанов та аларга рәхмәт белдереп, яңадан-яңа иҗат уңышлары теләп, киләчәктә дә сүрелмәскә, чыгышлары белән авылдашларны һәм тирә-як авыл халкын сөендереп торырга чакырды.