“Ак каен”нар сезне сагына

Без шулай гадәтләнгән инде, балалар бакчасы турында сүз башлануга Зөлфирә Камалованы күзаллап сөйлибез. Башкача мөмкин дә түгелдер, чөнки ул бакчаның бүгенге матурлыгын шул вакытларда ук күрә белеп, менә монда булачак дип беренче нигез ташын куючы да. Үз сүзеңне курыкмыйча әйтә белү һәм аны ышанычлы итеп дәлилләү өчен кыюлык кына аздыр, моның өчен батыр йөрәкле булу да кирәк. Бу сыйфатлар нәкъ менә Зөлфирә Фәсхиевнада инде. Гел күзеңә төбәп, вакыйганы ныклап аңлап, үзенә генә хас булган бер ягымлылык белән сөйләр ул. Алдашу яки бирелгән сораудан качу аның өчен ят. Аның иң беренче чиратта көчле эрудицияле һәр килеп туган мәсьәлә буенча хәбәрдар, аралашкан кешегә дә бер җиңеллек китерә кебек. Хәл-әхвәлеңне сорашмыйча бер вакытта да әңгәмәне башламас ул. Матур сөйләме белән дә бераз сихерләп тә җибәрә кебек әле. Дәлилләп тәмам ышандырмыйча үз фикереннән бер вакытта да кире кайтмас.

Тынгысызлыгы, тырышлыгы турында сүзне дәвам итеп, 32 ел буена шушы коллективны җитәкләп, район, республика, хәтта Рәсәй күләмендә ирешелгән уңышларны гына да саный китсәң шактый җыелыр иде. Ел саен узган республика семинар-укулары, күрсәтмә әсбаплар саны да бихисап.

Боларның барсына өстәп Зөлфирә Фәсхиевнаның иң күркәм сыйфаты - аның искиткеч кешелеклелеген атап үтмичә дә мөмкин түгел. Ул һәркемне тыныч кына тыңлар, җайлап тынычландырыр, аннан инде үзенең иң төпле киңәше белән озатыр. Без аның бер генә тапкыр да буш хыял, коры сүз артыннан йөргәнен хәтерләмибез. Әйткәнче кат-кат уйлый, әйткән икән эшли! Болары инде чын җитәкче сыйфаты. Балалар бакчасы өчен кирәкле әйберне табу, ә инде тапкан малны кадерләп тоту аның канына сеңгән, ахрысы. Үҗәтлеген дә кирәк чакта оста итеп җигә белә икән, бу да үзенә күрә бер уңай сыйфаты.

Бүген бакчабызда инде өченче буын тәрбиячеләр эшли. Безгә кадәр эшләгән апаларыбыз да күрешкәндә сагыну хисләрен, бик теләсәләр дә, яшереп бетерә алмыйлар. Чыннан да көчле, тату, матур бер гаилә булып эшлибез. Зөлфирә апабыз шулай теләде, ул шулай өйрәтте безне!
Яулаган үрләрне дә бирәсе килми бит. Шушыны да уйлап микән, үзе лаеклы ялга киткәндә коллективны кызы Зөһрәгә тапшырды. Беренчедән, бу безнең куанычыбыз булса, икенчедән, үз хезмәтен әрәм-шәрәм итәсе килмәведер дигән фикердә. Кайсы гына әти-әнидән сорама, барысы да рәхмәттән артык сүз әйтә алмаслар. Үзебезнең дә Зөлфирә апабызга ихтирамыбыз еллар белән арта бара, без аңа чиксез рәхмәтле.

Теләкләребез дә иң изгеләрдән, Ходай хәерле гомерләр генә бирсен үзенә.