Балалар сәпидтә элдерә, тыюлар онытылган

Мәктәп укучылары җәйге каникулга киткәндә һәрбер әти-әнигә шундый киңәш-йөкләнмә бирелде – 14 яше тулмаган балалар машиналар йөри торган юлларда сәпидтә йөрергә тиеш түгел, йөргән очракта да әти-әни карамагында булырга тиешләр дип. Әллә җәй башында әйтелгән сүз ике ай эчендә онытылды, әллә әти-әни баланың кайда йөргәнен белми, әллә инде балалар бу кисәтүләргә битараф, аңламассың. Тик соңгы берничә атна эчендә генә дә сәпидтә йөрүче балалар катнашында ике күңелсез хәлгә тап булдык. Беренчесе, Таузар-Түбән Кенә юлында, машина юлыннан баручы сәпидтәге кызлар арттан транспорт килгәнен карамыйча юлга килеп чыкса, икенче шундый ук очрак шушы атнада Көшкәтбаш белән Урта Көшкәт арасында булды. Шоферлар игътибарлы булмаса болай итеп йөрүләр ничек тәмамланыр иде икән, уйларга да куркыныч. Тик әти-әниләргә балаларының кайда йөргәннәрен белеп, катгый тыюларны кую бик кирәк. Булганның кадерен югалткач аңлыйбыз, аңа җитәргә язмасын.

Фото:https://pixabay.com