Балаларда сәләт күреп, канат куючы шәхес

Балалар бакчасында озак еллар эшләүче тәрбияче күп еллар балаларга бию өйрәтеп, аның серләренә төшендереп, гимнастикага мәхәббәт уятып эшләде. Ә бүгенге көндә ул мәктәпкәчә хәзерлек төркеме тәрбиячесе. - Һәрбер баланы да шундый яратам мин, алар безнең шундый акыллылар, - дип сөенеп әйтә ул.

Берәр бәйрәм җитә башладымы, Марина апа грандиоз планнар белән яна башлый, аның фантазиясенә сокланырлык. Балалар күңелендә искиткеч булып сакланып калырга тиешле бәйрәмнәргә ул бөтен күңелен биреп әзерләнә һәм әти-әниләрдән дә кабатланмас костюмнар белән балаларны әзерләүне көтә. Карап торышка таләпчән, ләкин балаларның киләчәген уйлап, аларны пөхтәлеккә өйрәтүдән алып тәрбияләүче Марина Михайловнабыз белән без бик горурланабыз. Тырыш хезмәтенә олуг бәя буларак бирелгән РФ Мәгариф министрлыгының Мактау таныклыгы белән тәрбиячебезне ихластан котлыйбыз. Киләчәктә дә үз эшеннән тәм табып, уңышларга ирешеп эшләргә язсын. Гаиләгездә тигезлек һәм бәхет гомерлек юлдашыгыз булсын!