Динә белән Лилиана сәяхәттән канәгать калды (фото)

15-17 май көннәрендә Балтач урта гомуми белем бирү мәктәбенең ике укытучысы — һөнәри конкурсларда җиңүчеләр Борһанова Динә һәм Әхмәтшина Лилиана «Федор Панферов» теплоходында күчмә семинарда катнаштылар.

Республиканың 150 педагогы Казан-Ульяновск-Тәтеш-Казан маршруты буенча сәяхәт итте.

Рейс барышында «Россиянең Ел укытучысы 2021» Бөтенроссия конкурсының федераль этабы призеры Мария Головановадан һәм «Минем беренче укытучым-2022» Бөтенроссия олимпиадасының абсолют җиңүчесе, Казан шәһәре Идел буе районының 83 нче лицее башлангыч сыйныф укытучысы Юлия Черновадан мастер-класслар, Гомумроссия мәгариф профсоюзының Татарстан оешмасы рәисе Ирина Проценкодан хокукый консультацияләр алдылар.

— Теплоход сәяхәтеннән без яңалыклар туплап, ял итеп, рухланып кайттык. Коллегаларыбызга әйтер сүзебез: һөнәри бәйгеләр укытучыдан зур көч, тырышлык, сабырлык, сәләт, белем, финанс чыгымнары сорый, ләкин менә мондый бәхетле мизгелләр, үз һөнәреңнең кирәклеген тою, олы бүләкләргә лаек булу, хөрмәт билгесе бу авырлыкларны җиңәргә, үз мөмкинлекләреңә ышанырга, яшерен ресурсларыңны ачарга ярдәм итә, — ди Динә Борһанова.

Мөгаллимәләребез әлеге мавыктыргыч сәяхәткә чыгу, ял итү мөмкинлеге бүләк иткән өчен Татарстан Республикасының Профсоюз оешмасы җитәкчесе, районыбызның профсоюз оешмасы җитәкчесе, Балтач муниципаль районының мәгариф идарәсенә зур рәхмәтле.