«Иӊ яхшы татар теле һәм әдәбияты укытучысы-2024» Бөтенроссия бәйгесенеӊ зона этабы узды (фото)

9 нчы февраль көнне Теләче районында «Иӊ яхшы татар теле һәм әдәбияты укытучысы-2024» Бөтенроссия бәйгесенеӊ зона этабы узды. Балтач, Арча, Әтнә, Теләче, Биектау, Кукмара районнарыннан килгән татар теле һәм әдәбияты укытучылары дәресләр һәм мастер-класслар күрсәттеләр. Бәйгедә Норма урта гомуми белем мәктәбенеӊ татар теле һәм әдәбияты укытучысы Әсәдуллина Энҗе Васил кызы чыгыш ясады.

Катнашучыларны Татарстан Республикасы Мәгариф һәм фән министрлыгының милли мәгариф идарәсе җитәкчесе Халиков Илгиз Илдар улы, Татарстан Республикасының халык укытучысы, Татарстан Республикасы Мәгарифне үстерү институтының татар теле һәм әдәбияты кафедрасы мөдире, филология фәннәре кандидаты, доцент, Татарстан Республикасының атказанган укытучысы, К. Насыйри исемендәге премия лауреаты Шәмсетдинова Рәсимә Равил кызы, Татарстан Республикасы Мәгарифне үстерү институтының фәнни-педагогик кадрлар әзерләү бүлеге мөдире Хисмәтова Лилия Котдус кызы бәяләде.

Һөнәри бәйгенеӊ зона этабында уӊышлы чыгыш ясаган укытучылар март аенда Казан шәһәрендә узачак йомгаклау турына чакырылачак.