Исемем матур, әтием куйган

Балага исем кушу - бик җаваплы һәм мөһим вакыйга. Минем әти-әнием дә бу эшкә бик җаваплы караган. Мин туганчы ук алар мәгънәле исемнәр эзләгәннәр. Малай булып туасымны белгәнгә күрә, исем сайлауны әтием үз өстенә ала. Мөнир бабаем әтиемнең эшен җиңеләйтү өчен аңа бер китап бирә. Ә анда исламның Аллаһыны олылауга багышланган, илаһи сыйфатларын, атрибутларын белдерүче эпитетлардан гыйбарәт исемнәр урын алган була. Әтиемнең күңеленә аеруча Рахман исеме хуш килә. Ул рәхимле, шәфкатьле, миһербанлы дигәнне аңлата.

Мин әти-әниемнең миңа Рахман исеме бирүләре белән горурланып яшим. Чөнки дөньяда минем исемне йөртүче бик күп данлыклы кешеләр барын беләм. Яңгул авылында дөньяга килгән шагыйрь Хәбра Рахман, тумышы белән Кукмараныкы булган Рифә Рахман исемнәре үк күпне сөйли. Малайзиянең премьер-министры Тунку Абдул Рахман, җырчы Хасбулат Рахман, шоумен Рахман Мәхмүдов исемнәре дә халыкка яхшы таныш. Зур танылу алган Рахманнар арасында күңелемә иң якыны ул, мөгаен, боксчы Хасим Рахмандыр. Чөнки мин - Рахман Газизуллин да боксны үз итүчеләрдән. Аерма шунда гына: адашым бокс белән бары 20 яшендә генә шөгыльләнә башлый, ә мин бокска 9 яшьтә килдем. Хасим Рахман барлыгы 61 ярышта катнашып, рингта 50 тапкыр җиңү яулый. Ә минеке әлегә сигез ярышта җиде җиңү генә. Киләчәктә мин дә адашым кебек үк зур танылу алып, күренекле Рахманнар исемемлеген тулыландырырмын дип уйлыйм.

Рахман Газизуллин,
Балтач урта мәктәбенең

6б сыйныфы укучысы.

Фото: youtube.com