"Каенкай"да "Карга боткасы"ннан авыз иттеләр

Борын заманда кешеләр нилектән яз булганын белмәгәннәр. Алар ямьле язны җылы яктан кара каргалар алып килә икән, дип уйлаганнар. Шуның өчен карлар эреп сулар ага башлагач, гөрләвекләргә таба, яңаруга-яшәрүгә йөз боргач, каргалар килү хөрмәтенә бәйрәм ясый торган булганнар. Аны "Карга боткасы" дип атаганнар. Бүген бистәбезнең 4нче номерлы балалар бакчасында уртанчылар һәм зурлар төркеме балалары әлеге бәйрәм уңаеннан бик матур концерт куйдылар.

Балаларны бәйрәмгә Яз алып килеп, язгы кояшлы көннең сихрилегенә, матурлыгына бөтен залны күмде. Кызлар һәм малайлар бәйрәм уңаеннан өйрәнгән шигырьләрен, җырларын, биюләрен күрсәттеләр. Бәйрәмнең иң кызган мәлендә аларга Әби белән Бабай да кушылды. Өлкәннәр кошлар кайтуын күреп, ботка бәйрәме ясарга кирәклекне әйтте. Әлеге фикерне бөтен кеше куәтләгәннән соң, әби ботка пешерергә тотынды, ә бабай төрле сораулар, табышмаклар аша балаларның белемен тикшерде. Әбинең боткасы бик тәмле булып пешеп, ул аның белән бөтен төркем балаларын сыйлап чыкты.

Балалар әлеге бәйрәмне бик көтеп алган иде, аның барышында да алар бик актив булып, шатлыкларыннан балкыдылар. Ә без үз чиратыбызда кечкенә яшьләрдән элекке гореф-гадәтләрне өйрәтеп үстерүче балалар бакчасы хезмәткәрләренә олуг рәхмәтләребезне ирештерәбез. Киләчәктә дә бакчабыз шундый күңелле бәйрәмнәрдән гөрләп торсын иде.