Һөнәри осталыкны бәяләү үзәгендә бер үк вакытта 25 педагог тест уза ала

Бүген Казанда Социалистик урамында педагогларның һөнәри осталыгын һәм квалификациясен бәяләү үзәген ачу тантанасы булды. Ул Республика олимпиада үзәге бинасында РФ Мәгариф министрлыгының педагогик кадрларны әзерләү һәм һөнәри үстерү департаменты директоры Андрей Милехин катнашында ачылды.

Үзәк «Мәгариф» милли проектының «Киләчәк укытучысы»федераль проектын гамәлгә ашыру кысаларында ачылды.

"Безнең үзәк 403 квадрат метр мәйданда урнашкан һәм берничә функциональ мәйданчыкны үз эченә ала. Хәзер без сертификацияләү зонасында торабыз. Биредә безнең укытучылар өчен „Просвещение“ нәшрияты тарафыннан тәкъдим ителгән методик әдәбият табарга мөмкин. Бу зона укытучылар укыту-методик әдәбият яңалыклары белән таныша алсын өчен даими яңартылып торачак», — дип сөйләде кунакларга педагогларның һөнәри осталыгын һәм квалификациясен бәяләү үзәге директоры Ләйсән Мингалиева.

Ул катнашучылар өчен яңа учреждение буенча экскурсия үткәрде. Мингалиева сертификацияләү зонасы үзәкнең «йөрәге» булуын билгеләп үтте. Биредә бер үк вакытта 25 кешенең һөнәри осталыгын өйрәнергә була. Педагогларга максималь уңайлылык — индивидуаль урыннар, аудио җиһазлар, интерактив панель тәэмин ителәчәк. Булган функционал онлайн-сораштыру һәм онлайн-тест үткәрергә мөмкинлек бирә. Аудиториядә сыйфатлы видеокүзәтү урнаштырылган.

"Үзәктә һәр кабинет „Киләчәк укытучысы“ проектының брендбукы нигезендә рәсмиләштерелгән, без аның нигезендә чәчәкләр һәм җиһазлар сайладык. Штатны туплый башладык инде. Бездә эксперт һәм тьютор — укытучыларның, тәрбиячеләрнең, белем бирү оешмалары җитәкчеләренең индивидуаль белем бирү траекторияләрен эшләү белән шөгыльләнүче җаваплы кешеләр бар", - дип билгеләп үтте спикер.

Үзәк «Мәгариф» илкүләм проектында катнашу аркасында ачылды, аның төп функциясе - һөнәри осталыкны тишерү, укытучыларның һәм җитәкчеләрнең квалификациясен бәйсез бәяләү процедурасы.

Шуны да билгеләп үтәргә кирәк, Татарстан Республикасы 2020 елда федераль бюджеттан республика бюджетына субсидияләр бирү буенча сайлап алу конкурсында җиңүче булды. Акчаның гомуми күләме 86 млн. сум тәшкил итә, шулардан 70 млн.сум — федераль һәм 16 млн. сумы — республика акчалары. Субсидия мебель, җиһазлар, исәпләү техникасы сатып алуга һәм ремонт эшләренә бирелә.

Әлеге чаралар ярдәмендә бүген Казанда Социалистик урамында һәм Оренбург трактында ике яңа үзәк ачылды. Икенчесе - педагогик хезмәткәрләрнең һөнәри осталыгын өзлексез күтәрү үзәге Казан федераль университетының структур бүлекчәсе булып тора.

Тулырак: ТИ

Фото: Владимир Васильев