Салавычта күптән көтелгән, балалар концерты булды

Сабыйларның ихласлыгы, сәләте, тәрбиячеләрнең тырышлыгы эзсез калмый - бар дөньяңны онытып, рәхәтләнеп ял итеп кайтасың. Салавыч балалар бакчасының быелгы концертын тамашачылар ике ел зарыгып көтте дисәк тә, һич арттыру юк. Алдагы елларда шыгрым тулы зал белән үткән концертлары белән авылдашлары күңелен яулап өлгергәннәр иде шул инде. Үткән ел, ни сәбәпледер, чыгышлары булмый калды.

Ә быелгысына башкаларына караганда да көчлерәк әзерләнгән коллектив. Башкача була да алмый, чөнки бу ел алар өчен юбилей елы. Колхоз көче белән төзелгән типовой бина ачылганга 30 ел тулган икән инде. Концертта балалар да, тәрбиячеләр дә чыгыш ясады. Һәр номер көчле алкышларга күмелде. "Безнең балалар бик сәләтле икән, аларны әзерләгән, өйрәткән тәрбиячеләргә мең рәхмәт!", - дип сөенде әти-әниләр, Лилия Закирова җитәкләгән коллективның иҗади эшчәнлегенә юагры бәя биреп.