Түнтәр укучылары кошларны кайгырта

Урамда кыш хакимлек итә. Бу вакытта көчле җилләрне җиңеп, нәни канатларын җилпеп азык эзләүче кошларга бик кыен. Кыска көннәрдә азык табып, тамакларын туйдырырга да өлгермиләр, инде кич килеп җитә.

Шуңа да кышын кошлар кеше янына елыша, агач ботагына кунып чыркылдашып, адәм балаларының игелекле гамәлләренә, мәрхәмәтенә өметләнәләр.Чөнки кошларга салкыннар түгел, ә ачлык күбрәк куркыныч тудыра. Шушыларны уйлап, кошкайларның гомерләрен саклап калу максатыннан Түнтәр мәктәбенең 5 сыйныф кызлары әти-әниләр ярдәме белән җимлекләр ясап, кошларны кайгыртканнар. Әлеге гамәл бөтен кешегә дә үрнәк булырлык шул, афәрин.