Үзләре бияләй кадәр, һөнәрләре капчык хәтле

Сабыйларыбызның да тиз ияләшүе, яратып йөрүе тәрбияче апаларының һәм аларның ярдәмчеләренең үз эшләренең осталары булып, балаларны яратып карауларындадыр дип ышанып әйтә алам. Олы кызыбызны тәрбияләүдә Әлфия Галимова, Рәхимә Сафиуллина, Земфира Фәләхетдинова зур өлеш кертсә, бүгенге көндә төпчек кызыбыз Язилә Зарипова, Рәхимә Сафиуллина һәм Наташа Рәхимова канаты астында саклана. Әлеге бакча коллективына без бик рәхмәтле, директорлары Алсу Хәсәнова бөтен сорауларыбызга, мөрәҗәгатьләребезгә аңлаешлы итеп җавап биреп, якты йөзен, тәмле телен кызганмаучылардан.

Әле кичә генә тәрбия бирү учагында ясле төркеменә йөрүче балаларның Яңа ел бәйрәме булып үтте. Сабыйларыбыз әлеге бәйрәмне бик аңлап бетермәсәләр дә, Кыш бабай белән Кар кызыннан һәм әкият дөньясыннан килгән башка геройлардан бер дә курыкмадылар, биеп тә, җырлап та, уйнап та күрсәттеләр. «Үзегез минем бияләй кадәр генә булсагыз да, һөнәрләрегез капчыгым кадәр икән», дип бәяләде аларның эшләрен тәм-томнар өләшүче Кыш бабйлары.

Ахырдан Алсу Фәритовна: «Балаларыгызның аяк селкетүләренә генә дә куаныгыз инде, әлегә яшьләре шундый», дигән сүзләрен дә без шатланып кабул иттек. Чөнки әле бик кечкенә балаларыбызны моның кадәр һөнәрләргә өйрәтү музыка укытучысы Алсу Әүбәкировага җайлылардан гына бирелмәве көн кебек ачык.

Коллективны ихластан Яңа ел бәйрәмнәре белән котлап, эшләрендә уңышлар, гаиләләрендә тигезлек теләп калабыз, саулык-сәламәтлектә киләсе елларда да очрашырга насыйп булсын.