Истәлеккә иңнәренә ак шәлъяулык япты (+фото)

Матур котлау сүзләре белән Россия Президенты В.Путинның котлау открыткасын, район башлыгының истәлек бүләген тапшырды. Юбилей истәлеге булсын дип ак шәлъяулык бүләк итте. 

Замананың бар авырлыгын үз җилкәсендә татыган, гомер буе тырыш хезмәт белән көн күргән Гәүһәрия әби олуг юбилеен якыннары хөрмәтендә, күрше-күләм, туганнары белән мул табыннар артында кршы алды. Балалары әниләренең туган көне уңаеннан мул табыннар әзерләп коръән ашы укыттылар.

Алар тормыш иптәше Әлтәф абый белән 65 ел матур гомер итеп, 6 бала тәрбияләп үстерәләр. Кызганыч бүгенге көндә Әлтәф абый гүр иясе. Бүген Гәүһәрия апа  унөч оныгы һәм унсигез оныкчыгы өчен бик кадерле әби булып гомер итә. Үз йортында ялгызы яшәсә дә, балалары  һәрвакыт кайтып тора, ярдәм итә, булыша. Карадуганда яшәүче кызы Нурия исә көндәлек әнисе янында.

- Әниебез бик сабыр кеше безнең, бик күп авырлыклар күрсә дә, күңел матурлыгын югалтмаган. Мебель, мех фабрикаларында эшләгән, гел мактаулылар рәтендә булган. Сукыр калган әбисен, соңрак әнисен тәрбияләгән. Кызганыч, соңгы елларда сәламәтлеге бик какшады. Ике мәртәбә операция кичерде, күзенә ак төште. Без аңа сызлануларсыз, имин, тыныч картлык телибез. Әле озак еллар безнең терәгебез булып яшәргә язсын. Әни ул җир йөзендәге иң зур бәхет, – ди кызы Нурия апа.