Олы йөрәкле ана 90 яшен билгеләп үтте

Иске Салавыч авылында гомер итүче Наҗия Зыятдинова 25 ноябрьдә якыннары янәшәсендә 90 яшьлек юбилеен билгеләп үтте.

Озак яшәүнең серен, мөгаен, әнисе белән кайнатасыннан алып калгандыр Наҗия апа. Әнисе - 93, ә кайнатасы 96 яшенә кадәр яшәгән булган.
Камил акылы, ачык хәтере, үткен зиһене, күзлексез дә газета-журналлар укый алуы, зур осталык белән бәйләве, йон егерләве, һәм әле дә тегү машинасында күлмәкләр тегеп кия алуы һәм бик күп уңай сыйфатларга ия булуы белән аны тәбрикләргә килгән һәркемдә ихластан соклану хисләре уятты. Наҗия Зыятдинова 90 яшькә җитсә дә, балаларына бияләй, оекбашлар, шарфлар бәйләп бүләк итә.

Ул хезмәт юлын укытучы буларак башлап җибәрә, Көшкәтбаш, Норма, Салавыч мәктәпләрендә укыта. Аннары махсус курслар үтеп кайткач, Салавыч авыл җирлеге идарәсенә секретарь итеп билгеләнеп, 32 ел намуслы хезмәт башкара ул. Авыл халкы белән килешеп, уртак тел табып эшли ул. Авылдашлары аны бик хөрмәт итә. Наҗия апа Район Советы депутаты булып та сайлана.

Наҗия апа тормыш иптәше - Бөек Ватан сугышы ветераны Мөбәракша Зыятдинов белән гаилә корып, дүрт бала тәрбияләп үстерәләр. Уртак балалары өчәү булса, берсе - Мөбәракша аганың бертуган сеңлесенең улы. Ул баланы үз канаты астына алганда Илдар исемле бу ир балага нибары 1 яшь чамасы гына була. "Тәпи дә йөри белми иде әле ул вакытта. 4 баланы да тигез күрдем, аермадым, бергә үстеләр", ди олы йөрәкле ана. Хәзерге көндә аның барлык балалары да исән-сау, 6 оныгы, 6 оныкчыгы бар. "Һәркайсының игелеген күреп яшим. Улым Рашит белән киленем Халисә мине кадер-хөрмәттә генә тоталар", ди тормышыннан бик тә канәгать булган юбиляр.