Рөстәм Миңнеханов үзенең Instagram битендә Казан хосписы турында ролик тәкъдим итте һәм аңа ничек ярдәм итәргә кирәклеген искәртте

«Бу авыр, әмма бу хакта белергә кирәк», – дип язган республика җитәкчесе видео астына. Бу турыда «Татар-информ» мәгълүмат агентлыгы хәбәр итә.

Татарстанлыларга Казанда балалар хосписын булдыру тарихы яхшы билгеле. Владимир Вавиловка күп сынаулар узарга туры килә — якыннарын югалткач, ул үз тормышын авыру кешеләргә ярдәм итүгә багышларга була. Һәм хоспис булдыра.

«Хоспис — ул үлем турында түгел, ә ахырга кадәр лаеклы тормыш турында», – дип аңлатты хоспис фәлсәфәсен Вавилов.

Проект хосусый-дәүләт партнерлыгы буларак тормышка ашырыла. Димәк, аны тормышка ашыруда дәүләт, предприятиеләр, эшмәкәрләр һәм битараф булмаган кешеләр ярдәм итә.

Фондка теләсә нинди ярдәм мөһим. Акча да — хәзер икенче хоспис төзелә, шуңа күрә һәр тиен кадерле, мораль яктан да — «авыртусыз йорт»ка волонтерлар, клоуннар, артистлар килә.

Казан хосписында үлем диагнозы булган кешеләргә ярдәм итүнең иң мөһиме — кайгыртучанлык һәм кешелеклелек. Шуңа күрә «авыртусыз йорт»ка гадәти кешеләр ярдәм итүе бик мөһим.

Хосписка ничек ярдәм итәргә икәнен социаль челтәрләрдә һәм аның сайтында белергә була.

Чыганак: «Татар-информ» ; фото: видеодан скриншот